iklan

NASIONÁL, EDUKASAUN, DILI, HEADLINE, MUNISÍPIU

MESSK kontinua rekruta estudante bolsa hakbiit na’in-1.118

MESSK kontinua rekruta estudante bolsa hakbiit na’in-1.118

Ministru Ensinu Superiór, Siénsia no Kultura, Longuinhos dos Santos. Imajen Tatoli/Antonio Daciparu.

DILI, 06 dezembru 2022 (TATOLI) – Ministériu Ensinu Superior, Siénsia no Kultura (MESSK) kontinua rekruta tán estudante bolsa hakbiit hamutuk na’in-1.118 iha tinan ida atubele kompleta númeru estudante bolsa hakbiit 3.000 ne’ebé planeia ona.

Ministru Ensinu Superiór, Siénsia no Kultura, Longuinhos dos Santos, informa, prosesu rekrutamentu rejime bolsa hakbiit ba tinan ida-ne’e tuir planu sei presiza tán estudante na’in-1.118 atu nune’e bele kompleta meta VIII governu nian ba tinan tolu ho totál númeru hamutuk 3.000.

“Ita-nia meta ba tinan rua ne’e konsege ita atinje ona estudante bolsa hakbiit hamutuk 1.882 ne’ebé konsege ita koloka hotu ona. Agora ita hein tán estudante 1.118 mak tinan ida-ne’e ita sei rekruta tán,” Longuinhos dos Santos hato’o asuntu ne’e ba jornalista sira hafoin asina akordu ho Estadu Unida Amérika iha salaun MNEK, tersa ne’e.

Nia haktuir, planu VIII governu nian hodi loke oportunidade bolsa hakbiit ba estudante sira ho intensaun atu promove igualdade oportunidade ba kada munisípiu sira. Kada munisípiu hotu iha territóriu nasionál inklui Rejiaun Administrativu Espesiál Oé-Cusse Ambeno (RAEOA) no Atauro ne’ebé sai ona munisípiu mós sei hetan direitu atu asesu ba programa bolsa hakbiit ne’e rasik.

Purtantu ko’alia kona-ba prosesu rekrutamentu ba estudante foun asesu ba Universidade Nasionál Timor Lorosa’e (UNTL). Longuinhos haktuir, governu hein hela proposta UNTL nian vaga hira maka sira presiza depois submete mai ministériu atubele hetan konsiderasaun.

Normalmente atu define no identifika kuantidade ba estudante tenke hosi governu liuhosi ministériu. Maibé MESSK serbisu no koopera di’ak ho UNTL atu proposta ne’ebé sira sei haruka mai hira bele hetan konsiderasaun.

Jornalista   : Tomé Amado  

Editór           : Evaristo Soares Martins

iklan
iklan

Leave a Reply

iklan
error: Content is protected !!