DILI, 06 dezembru 2022 (TATOLI)– Governu planea haloot restu mortál hamutuk 500-resin iha Postu Administrativu Laga, Munisípiu Aileu, iha loron 15 fulan-dezembru 2022.
“Mai informa ba Primeiru-Ministru katak, iha loron 15 dezembru ne’e ita haloot tan restu mortál 500-resin iha Laga”, Sekretáriu Estadu Asuntu Kombatente Libertasaun Nasionál, Julio da Conceição ‘Loro Mesak’, hateten hafoin hasoru Primeiru-Ministru (PM), Taur Matan Ruak, iha Palásiu Governu, tersa ne’e.
Nia hatutan, restu mortál sira ne’e rekolla dezde tinan 2013, ne’ebé rai hela to’o agora mak foin bele haloot.
“Família konkorda atu hamutuk ho Governu entaun deside ona loron atu haloot. Restu mortál sira ne’ebé atu haloot postu administrativu Laga de’it”, nia dehan.
Ezekutivu ne’e afirma, restu mortál ne’ebé atu haloot balun simu ona pensaun no balun seidauk, maibé Governu planea ona atu loke rejistu foun nune’e sira ne’ebé seidauk bele rejista.
Orsamentu ne’ebé prevee ba seremónia haloot restu mortál hamutuk $100.000-resin.
Restu mortál sira iha Munisípiu seluk daudaun prosesu konstrusaun ba kampaun la’o hela, kuandu ramata maka bele deside loron hodi haloot.
Antes ne’e, Governu haloot ona restu mortál iha Munisípiu Manufahi, Aileu, no Postu Administrativu Quelicai (Baucau). Hafoin haloot tiha iha Laga, tuir mak mak Munisípiu Ermera, no Postu Administrativu Uatolari (Viqueque).
Jornalista : Antónia Gusmão
Editór : Rafael Ximenes de A. Belo
