Relembra istória pasada hodi hateke ba prosesu dezenvolvimentu
VIQUEQUE, 07 VIQUEQUE 2022 (TATOLI)- Komemorasaun loron memória 7 dezembru ba dala-47, organizasaun naun governamental lokál Fundasaun Knua Haberan Komunidade (KHK), Agusto Pinto, hateten relembra istória pasada hodi hateke ba prosesu dezenvolvimentu nasionál.
“Ohin, ami realiza atividade semináriu hodi komemora loron ativizmu 16 dezembru kampaña, maibé ami deside planu realiza semináriu iha 7 dezembru. Tanba loron 7 dezembru sai mós loron eroi nasionál nune’e realiza atividade sira-ne’e hodi relembra istória pasadu atu hateke ba oin bele kontribui prosesu dezenvolvimentu nível nasional no munisípiu,” Diretór ezekutivu fundasaun KHC, Augusto Pinto, hateten liuhosi ninia diskursu abertuta semináriu ho tema promove igualidade jéneru, iha edifísiu KHK, Beobe, kuarta ne’e.
Nia hatutan, semináriu ba loron ohin ho objetivu rua ida komemora 7 dezembru no komemora loron ativizmu 16 dezembru kampaña atu ema hotu hamutuk redús nível violénsia feto no labarik.
“Oinsá ita hotu hamutuk foti papél ida hanesan Viqueque-oan nune’e bele komtribui ba redús violénsia iha família no iha sosiadade nian leet,” nia hato’o.
Nia subliña, liuhosi atividade sira-ne’e bele motiva funsionáriu sira tanba dala ruma ba terrenu hasoru ema ho karáter oioin. Entaun iha momentu ida-ne’e halo reflesaun hodi husik ba tinan ida-ne’e.
“Ita bele hanoin foun hodi hakat ba oin. Ho hanoin ida-ne’ebé di’ak no hanoin ida-ne’ebé progresu. Tán ne’e mak ami realiza seminariu ida-ne’e,” nia akresenta.
Atividade ne’e realiza hetan apoia orsamentu hosi Caritas Australia no KHC totál hamutuk $1.110.
Iha seminariu ne’e partisipa grupu feto, estudante, Polísia Nasionál Timor-Leste (PNTL) munisípiu Viqueque.
Jornalista: Vitorino Lopes da Costa
Editóra: Evaristo Soares Martins
