COVALIMA, 08 dezembru 2022 (TATOLI) – Koordenadór Bee Timor-Leste, Empreza Públiku (BTL,E.P), iha Covalima, Cartro Dodi Ramos, informa hahú hosi dezembru 2021 to’o dezembru 2022 konsege rekolla reseita $10,171.10 ba kofre Estadu.
“Ezisténsia BTL, E.P iha Covalima ne’e durante tinan-ida no ami rekolla no kontribui ona reseita $10,171.10 ba kofre Estadu”, relata resposavél ne’e ba Agência TATOLI iha kna’ar fatin Sukaer-laran,Covalima, kinta ne’e.
Reseita ne’ebé BTL, E. P kontribui ba kofre Estadu ne’e, mai husi implementa tarefa liuhosi monta kontadór ba kliente-sira no mós instala bee-moos ba uma-kain sira iha área urbana.
Hafoin halo instalasaun no monta kontadór ba uma-kain sira to’o fulan kliente sira selu direta iha edifísiu BTL,E.P, hafoin funsionáriu sira lori osan ba rai iha Banku Nasionál Komérsiu Timor-Leste (BNCTL).
Tuir dadus husi BTL, E. P rejista ona uma-kain 1,325 mak asesu bee-moos, husi númeru ne’e kliente 710 mak kumpre ona regra tarefa hosi BTL,E.P no balun seidauk kumpre ho razaun sei asesu bee-moos ladun di’ak.
Ho razaun komunidade hirak ne’e, nia dehan BTL,E.P konstinua esforsu, nune’e kliénte sira bele asesu bee-moos ho di’ak hodi kontribui mós reseita ba Estadu.
Tabela tarefáriu ne’ebé vigora bazea ba Dekretu-Lei númeru 4/2004, 11 fevereiru 2004, kona-ba aprova rejime fahe ba públiku ho diploma ministerial númeru 1/2004 konaba tabele tarifáriu.
Tabela tarifáriu mak uza hodi selu bee-moos ne’ebé hatudu tipu kliente bee-moos konsumu no gastu, kliente bee-moos ne’ebé konsumidór sei selu bee-moos uza liuhusi torneira.
Tarifáriu abatesimentu bee-moos halo kobransa fulan-fulan hanesan tipu kliente to’o konsumu litru 14 metru kúbliku ho tarifáriu kada litru $0,20, ho nune’e fulan-ida selu $2,80 no bainhira uza bee-moos fulan-ida ho volume 15 litru kúbliku $0.40, nune’e fulan-ida sei selu $3,20
Jornalista :Celestina Teles
Editór : Florencio Miranda Ximenes
