DILI, 08 dezembru 2022 (TATOLI)-Prezidente Repúblika (PR), José Ramos Horta, iha loron kuarta (07/12), hasoru grupu emprezariál rua husi Kuwait no Estadu Unidu Amérika (EUA), hodi ko’alia kona-ba oportunidade mai hala’o investimentu iha Timor-Leste.
“Sira hakarak haree oinsá sira bele kontribui bá finansiamentu projetu infrastutura iha Timor-Leste, grupu ne’e, grupu bo’ot ida, sira bele finansia diretamente ou bele mobiliza investedór seluk, inklui banku singnifika impréstimu, no tuir sira esplika katak funan sei kama’an, menus 3% la iha limite’’, Xefe Estadu haktuir, liu hosi komunikadu imprensa ne’ebé Agéncia TATOLI asesu, kinta ne’e, hafoin enkontru informál ne’ebé hala’o iha Embaixada Timor-Leste iha Singapura.
Tuir Xefe Estadu, empreza hirak ne’e bele finansia Greater Sunrise to’o billaun $12 no prefere halo mós investimentu iha área infrastrutura.
“Sira mós hakarak iha atividade investimentu barak liu, tanba sira iha investimentu iha Áfrika no alíende ne’e, sira mós bele halo planu bá Timor-Leste kona-ba aeroportu, estrada, óspital, no uma ba kbi’it laek sira rihun ba rihun tuir negosiasaun ruma karik governu interesadu bele hasoru sira, hodi prepara planu investimentu ida ne’e”, Horta esplika liu hosi nota.
Empreza husi Kwait, Al-Bader International Development Co.W.L.L disponivel atu ko’alia ho governu hodi harii uma ba sidadaun vulnerável, husi dezeñu, proposta orsamental no tuir padraun ne’ebé sira aplika ona iha rai barak.
“Sei la gratuita tanba halo konforme akordu entre investor ho governu. Aliénde ne’e, xefe ekipa delegasaun husi empreza Al-Bader, Yousef A. Albader deklara mós katak sira prontu atu investe iha area turízmu” salienta Xefe Estadu.
Prezidente Repúblika mós aproveita biban hodi hasoru malu ho Open Society-Asia Pacific, kona-ba planu investmentu ne’ebé antes ne’e Xefe Estadu ko’alia ona ho nia Fundadór George Soros nu’udar billionáriu Amerikanu.
‘’Grupu ne’e ema billionáriu Amerikanu ida nian, ha’u enkontru ona ho sira iha Díli no dala-ida iha Nova Iorké, no ha’u husu ba sira ajuda halo revizaun ba Planu Estratéjiku Dezenvolvimentu Nasionál (PEDN) 2011-2030, tanbá hahu planu PEDN no iha implementasaun 2011, tinan 10 liu ona, atu haree saida mak halo di’ák, saida mak iha fallansu iha planu ne’e no tambá ekonomia mundiál ne’e troka an ba mai, se aspetu planu balun ita mantém ou bele halo alterasaun no adaptasaun konforme situasaun rejionál no mundiál’’ Xefe Estadu hateten.
Ba Xefe Estadu, revizaun ba PEDN presiza duni hodi adapta tuir nesesidade industrial ne’ebé hanaran intelijénsia artifisiál teknolojia dijitalizasaun.
Prezidente Repúblika mós husu atu ekipa avaliadór kontinua halo revizaun ba PEDN no bainhira remata bele halo diskusaun hamutuk entre revizaun husi Grupu Open Society no parte governu mós presija halo klean.
‘’Open Sosiety hahu serbisu ona iha fulan sira ne’e nia laran, no inisíu tinan 2023, bele entrega ona ba Prezidente Repúblika sira nia estudu no proposta estratejia ba Timor-Leste’’ Horta subliña.
Antes ne’e, Prezidente Repúblika, hala’o uluk entrevista ida ho rádiu ida husi Melborne (Australia ) kona-ba saudoza Jill Jollife ne’ebé mate iha semana kotuk.
Horta koñese Jill Jolliffe hanesan sindikalista Australiana to’o sai nu’udár jornalísta koñesida iha Austrália tamba sempre públika no hakerek kona-ba luta povu Timor-Leste ba ukun-rasik-án, ne’ebé hahu husi akontesimentu Balibó Five to’o funu remata.
“Jill Jolliffe mai Timor iha tinan 1975 no mai nu’udár elementu delegasaun sindikalista Australianu nian no bainhira iha ha’u nia vizita solidariedade iha Jullu 1974, no liu tan tinan ne’e hakerek ona notísia kona-ba Timor’’ rekorda Xefe Estadu.
Akompaña Xefe Estadu iha enkontru ne’e, Ministru Koordenador Asuntu Ekonomiku (MEKAE), Joaquim Amaral, Assesór Helder Lopes, embaixadora Maria Carrascalão, Prezidente Trad Investiment, Arcanjo Leite.
Jornalista: Nelson de Sousa
Editór: Florencio Miranda Ximenes
