BTL, E.P sei konstrui konservatóriu bee iha Tuana Laran

DILI, 09 dezembru 2022 (TATOLI)—Vise Prezidente Bee Timor-Leste (BTL), Empreza Públiku (BTL, E,P), Gustavo da Cruz, hateten iha tinan 2-23 ne’e BTL, E.P sei konstrui konservatóriu bee nian ba komunidade Vila Verde no Matadouro iha Tuana Laran Manumeta Raihun nian.
“Sistema bee-moos iha Tuana Laran ne’e, ita halo sistema bomba no ita finaliza ona projetu ne’e no ida-ne’e ita halo fazeamente, nune’e ita halo uluk perfurasaun depois instala tiha bomba mak ita halo kanalizasaun. Maibé projetu kanalizasaun ita foin inisia ho profisionalmente ho tékniku sira iha terrenu hodi halo hela servisu, nune’e halo konesaun no bele funsiona bomba ho provizoriamente hodi hein faze daruak nian ne’ebé mak sei halo tanke konservatóriu bee nian iha Tuana Laran, Manumeta Raihun Leten,” Vise Prezidente BTL, E.P ne’e hateten ba jornalista sira, hafoin partisipa sorumutu nasionál iha ámbitu komemorasaun loron direitu umanu ba dala-75 (1945-2022), iha salaun Luz Clarita, sesta ne’e.
Konservatóriu ida-ne’e mak sei distribui bee ba komunidade iha Vila Verde, Matadouro no Tuana Laran hodi bele asesu, no fatin atu konstrui konservatóriu bee ne’e identifika ona.
“Ami halo aproximasaun ho autoridade komunitária no hetan apoiu hosi Administradór Postu no identifika ona fatin, nune’e ami-nia enjiñeiru komesa halo ona. Espera katak inisiu tinan oin ami bele halo konkursu, nune’e ami halo ona servisu,” nia dehan.
Vise Prezidente BTL, E.P ne’e dehan, osan ne’ebé atu gasta ba konstrusaun konservatóriu ne’e liu $100.000
Previzaun atu rezolve bee-moos, Vise Prezidente BTL, E.P ne’e hateten, sei garante komunidade iha territóriu nasionál sei asesu bee-moos ho di’ak.
BTL, E.P rejistu konsumidór bee 16.000
Aleinde ne’e, nia informa, BTL, E.P rejista konsumidór bee iha kapitál Dili hamutuk 16.000 maibé ida-ne’e selu ne’e kuaze 3% de’it.
“Ita iha konsumidór hamutuk 16.000 maibé ida-ne’ebé selu ne’e kuaze 3% hosi 16.000 ne’e. Barak mak la selu tanba konxiénsia mak laiha, maske sira asesu ona ba bee-moos,” Vise Prezidente BTL ne’e hateten.
Maibé, nia dehan, ida-ne’e BTL, E.P kontinua esforsu atu komunidade hotu-hotu bele asesu bee ho di’ak nune’e bele nesesita sira-nia nesesidade.
“Ami esforsu hela atu ita-nia komunidade ne’ebé asesu ona bee maske seidauk asesu oras 24, maibé mós fó kontribuisaun para vizinu balun ne’ebé presiza bele asesu mós. Nune’e inan-aman sira-ne’ebé la asesu bee ne’e mós bele asesu,” nia dehan.
Husu kona-ba reseita, nia hatán, kada tinan BTL, E.P hetan $150.000 to’o $200.000 maibé iha tinan ne’e hetan $500.000.
“Ami-nia ezisténsia foin mak tinan ida maibé ami esforsu makaas para tinan 2023, tuir planu negósiu BTL, E.P nian, iha tinan 2026-2027, BTL hamriik mesak ona no sei la depende ba orsamentu Estadu nian,” nia hateten.
Nune’e, tuir nia, iha tinan 2028 ne’e previzaun BTL, E.P nian atu rezolve bee iha territóriu nasionál sei asesu bee ho di’ak no sei laiha problema kona-ba bee-moos.
Jornalista : Osoria Marques
Editór : Cancio Ximenes

