iklan

NASIONÁL, EDUKASAUN, DILI, HEADLINE

MEJD prevee millaun $7,2 atu atribui ba estudante mellor klasifikada

MEJD prevee millaun $7,2 atu atribui ba estudante mellor klasifikada

Ministru Edukasaun Joventude no Desportu, Armindo Maia. Imajen Tatoli/Francisco Sony

DILI, 09 dezembru 2022 (TATOLI) – Ministru Edukasaun, Juventude no Desportu (MEJD), Armindo Maia relata katak orsamentu ne’ebé prevee ona atu apoiu bolsa méritu ba estudante mellor klasifikada na’in 3.500 resin iha tinan letivu 2022 ne’e hamutuk millaun $7,2.

“ita prevee ona osan hamutuk millaun $7,2 atu prepara prémiu ba estudante melor klasifikadu sira iha tinan ida-ne’e. Ne’e osan boot. Maibé ita seidauk define estudante ho prestasaun di’ak atu simu hira,” Ministru Armindo Maia hateten ba jornalista sira iha salaun Konferénsia MEJD, Vila Verde, sesta ne’e.

Estudante sira-ne’ebé maka sei tama iha mellor klasifikasaun ne’e sei foti hosi eskola sira iha territóriu nasionál, tantu eskola públiku no eskola privadu. Totál estudante ne’ebé sei hetan bolsa méritu ne’e hamutuk na’in 3.500 resin.

Ministériu Edukasaun deside ona eskola sira ne’ebé mak sei tama iha klasifikasaun ne’e foti hosi eskola públiku no privadu sira maibé eskola internasionál no edukasaun ensinu rekorrente la tama.

“Ha’u hakarak informa de’it katak mezmu edukasaun nível ensinu rekorrente eskola públiku nian maibé sira ladauk tama tanba iha lei GOP ne’ebé aprova foin lalais ne’e la kontempla kona ba ensinu rekorrente nian. tanba ne’e MEJD seidauk bele define edukasaun nivel ensinu rekorrente atu hetan bolsa méritu ne’e,” tenik nia.

Maibé prémiu saida maka MEJD sei prepara atu fó ba estudante mellor klasifikadu sira, tuir membru VIII governu konstitusionál ne’e katak iha tempu besik Ministériu Edukasaun sei fó sai iha diploma ministeriál kona-bá atribui prémiu mellor klasifikadu ba estudante primeiru no terseiru lugár ho montante hira.

“ita seidauk bele informa agora tanba ministériu foin maka anunsia rezultadu ezame nasionál inklui eskola sira mós foin maka realiza asina kaderneta ba estudante pasajen de klase sira tanba ne’e presiza hein depois maka ita sei anunsia ninia rezultadu ezame sira,”

Jornalista: Tomé Amado

Editór: Evaristo Soares Martins

iklan
iklan

Leave a Reply

iklan
error: Content is protected !!