BAUCAU, 09 dezembru 2022 (TATOLI) – Primeiru Ministru (PM), Taur Matan Ruak, sesta ne’e lansa fatuk dahuluk ba reabilitasaun estrada diresaun Uai-aka, postu administrativu Quelicai ba Nahareka, postu administrativu Ossu, munisípiu Viqueque no postu Laga ba Baguia.
Estrada diresaun rua refere hala’o lansamentu iha fatin rua diferente, hanesan estrada reabilitasaun postu Quelicai ba postu Ossu, Nahareka hala’o iha area Uai-aka, suku Abafala no estrada diresaun postu Laga ba Baguia hala’o iha suku Soba.
Primeiru Ministru Taur Matan Ruak, sente haksolok partisipa iha serimónia lansamentu fatuk dahuluk iha estrada Uai-aka, postu Quelicai no Laga ba Baguia nu’udar pasu importante ba komunidade iha área hirak-ne’e.
Xefe governu husu autoridade postu, suku, veteranu no komunidade atu kontribui durante prosesu reabilitasaun estrada nune’e bele finaliza lalais ba interese jerál.
“Favór ida ajuda kontribui tanba ha’u hatene imi hein kleur ona entaun sei ajuda, buat ruma ko’alia sei buka solusaun,” Primeiru Ministru hateten iha Uai-aka, suku Abafala, postu Quelicai.
Estrada hirak-ne’e liga entre komunidade ba merkadu, fasilita turista sira atu vizita sítiu relijiozu inklui foho matebian no asesu ba eskola.
Objetivu hosi projeitu refere hakarak promove konetividade tuir padraun estrada munisípiupiu hodi kontribui ba dezenvolvementu sósiu-ekonomika iha área rúral.
Prezidente Autoridade Munisipál Baucau, Olivio ‘Bou-Lesa’ Freitas hateten, ho reabilitasaun estrada iha postu Quelicai no Baguia lori esperansa ba komunidade tanba durante tinan barak povu halerik, kolen no lori oras naruk atu to’o fatin distinasaun.
“Estrada di’ak mak ema barak nia esperansa, ohin lansamentu fatuk dahuluk hatudu estrada reabilita duni,” Bou Lesa hateten.
Autoridade Munisipál Baucau agradese ba governu sentrál no apela ba autoridade postu, suku no komunidade liuliu joven sira atu kontribui ba prosesu tomak reabilitasaun estrada refere.
Estrada postu Quelicai ho distánsia kilómetru 22.7 no luan metru 7, komposta hosi aspal metru 4, alargamentu metru 1 no ombru metru 2, dreinajen, moru protesaun, sinál tráfegu no kuda ai-oan ba fatin ne’ebé risku.
Diresaun Nasionál Estrada, Ponte no Kontrolu Cheias hosi Ministériu Obra Publiku (MOP) aloka orsamentu hosi fundu infraestrutura tinan fiskál 2022 hamutuk $16.547.661,76.
Durasaun ba reabilitasaun estrada refere fulan-18 ne’ebé responsável hosi kompañia Chongqing Internasional Construction no supervizaun hosi kompaña PY konsep perunding Sdn Bhd hosi Malázia ho durasaun kontratu fulan-18 no totál orsamentu $ 452.122.00.
Enkuantu estrada diresaun Laga-Baguia purvolta kilómetru 38 ho luan metru neen ne’ebé sei responsál hosi kompañia Norinco internasional cooporation ho tipu reabilitasaun ho totál orsamentu millaun $21.7.
Jornalista : Natalino Belo
Editór : Evaristo Soares Martins
