DILI, 10 dezembru 2022 (TATOLI)- Sekretaria Estadu Kooperativa (SEKoop), realiza atividade hodi kememora loron mundiál Direitu Sósiu Ekonómiku.
“Ita selebra loron direitu sósiu ekonómiku ba dala-rua, iha ámbitu Governu nian, maibé desde tinan 2010 koperatva ne’e tinan-tinan selebra loron ne’e. Tanba saida komemorasaun ne’e iha, tanba ita-nia artigu ida iha Konstituisaun RDTL artigu 138, ko’alia kona-ba organizasaun ekonómiku, ne’e kompostu hosi setór tolu, hanesan setór públiku, privadu no koperativa. Enkuantu iha Konstituisaun artigu 50 ne’e hateten momós katak, Estadu promove kriasaun koperativa nu’udar meiu ba kriasaun postu traballu”, Sekretáriu Estadu Koperativa, Elizario Ferreira, hateten iha ámbitu komemorasaun loron mundiál, iha salaun Tower, Fatuhada, sábadu ne’e.
Tanba ida ne’e loron Internasionál direitu sósiu ekonómiku ne’e parte integrante hosi esperitu Konstituisaun ne’e, tanba ne’e parte Sekretaria Estadu Koperativa komemora loron ida ne’e atu fó oportunidade ba negosiante sira, ema hotu ne’e maka partisipa atividade ekonómiku atu bele promove sira-nia produtu, promove mós sira-nia auto empregu ba sira-nia aan no kontribui mós redusaun kiak nomós kriasaun postu servisu iha ita-nia rain.
“Ne’ebé komemorasaun ne’e parte ida hosi promosaun ba dezenvolvimentu koperativa nian, no hodi mobiliza populasaun partisipasaun iha atividade ekonómiku iha rai-laran”, nia afirma.
SEKoop mós esforsu atu iha tinan sira mai, populasaun ho 40% partisipa iha grupu koperativa.
“Atu atinje ida né’e dadaun SEKoop halo hela promosaun liliu atividade haat mak prioridade, mak koperativa produsaun, promove kriasaun koperativa agrikola, pekuária no koperativa komésiu, tanba populasaun kuaze 78% agrikultór no restu ne’e hola parte iha atividade negósiu tanba ne’e hola parte iha koperativa atu nune’e sira bele promove sira-nia negósiu no promove merkadu ba sira, atu nune’e sira nafatin prodús hodi oferese ba merkadu”, nia esplika.
Komemorasaun loron mundiál ne’e, SEKoop realiza komboiu hodi halo promosaun atividade ekonómiku.
SEKoop rejista kooperativa primáriu hamutuk 444, hosi totál koperativa kréditu 127, koperativa produsaun 317, hosi ne’e akomoda membru hamutuk 97.000, hosi atividade koperativa ne’e, dadaun ne’e akumula ona osan hamutuk millaun $36.
Jornalista : Antónia Gusmão
Editór. : Rafael Ximenes de A. Belo
