KUPANG, 10 dezembru 2022 (TATOLI) – Atleta Taekwondo ho naran kompletu, Adelaide Catarina Colo hosi Rejiaun Administrativa Espesiál Oé-Cusse Ambeno (RAEOA, ) sábadu ne’e sai manán-na’in iha kompetisaun open turnamen eventu Kepala Kejaksaan Tinggi (KAJATI) hafoin halakon atleta na’in-haat iha klase kadet ho todan kilograma 33.
Kompetisaun open turnamen eventu KAJATI ne’e kompete iha prátika taekwondo nian ba Kyoirugi no Poomsae ba klase kadet nian, ne’ebé realiza iha Gedung Desportu (GOR) distritu Kupang propinsia Nusa Tenggara Timur (NTT), Repúblika Indonézia.
Atleta Adelaide Catarina Colo, konsege halakon atleta na’in-haat iha klase kadet maka hanesan, atleta Aurelia Miriam Banu hosi Timur Tenggah Selatan (TTS) Indonézia, manán ho ronde rua iha minutu haat (4).
Halakon atleta daruak, Sandra, hosi KONI Díli Timor-Leste, halakon atleta datolu, Dela Monis hosi distritu Timur Tengah Utara (T) grupu A, no halakon atleta dahaat, Alin Zacharias hosi ATC Nusa Tenggara Timur (NTT).
Tuir kalendáriu ba open turnamen eventu KAJATI realiza durante loron tolu, hahú sesta (9/12) to’o domingo (11/12), no partisipa atu kompete iha eventu ne’e hamutuk dozan 32 ho totál atleta na’in 845. Hosi atleta na’in-845 ne’e maioria mane hamutuk 495 no feto-317 inklui Timor-Leste.
Purtantu ho regulamentu ne’ebé fó sai hosi komisaun organizadora KAJATI mak hanesan, atleta sira compete ho kategória pra-kadet A ba idade tinan neen (6) to’o hitu (7), pra-kadet B ba idade ualu (8) to’o sia (9), pra-kadet C ba idade 10 to’o 11, pra-kadet D ba idade 12 to’o 14, nune’e mós seniór no juniór.
Nune’e mós durasaun tempu ba kompetisaun ne’e iha ronde tolu, kada ronde kompete minutu rua (2) no deskansa minutu ida (1), maibé bainhira atleta ida manán ronde tutuir malu iha direitu tomak atu manán laiha kontinuasaun ba ronde ikus.
Treinadór Taekwondo RAEOA, Jacob Efi, hato’o parabéns no agradese tanba atleta vensedór, ne’ebé repreza oé-Cusse mai kompete iha eventu internasionál ne’e konsege hamorin ona naran Timor-Leste
“ Hanesan treinadór ha’u agradese ba ita-nia atleta nia esforsu, durante ha’u mak fasilita treina, ita agradese tanba treina ne’ebé ita hetan, ohin hatudu ona iha públiku, katak, treinu no mentalidade mak sai sasukat bai ta iha kompetisaun ida, entaun iha ohin hetan rezultadu hamorin ona Timor-Leste nia naran iha eventu ne’e”.
Nia informa, antes ne’e atleta na’in-20, mane sia (9) no feto 11 mak reprezenta RAEOA hodi kompete iha eventu KAJATI, akompaña hosi treinadór hamutuk na’in-haat (4), ne’ebé dezloka hosi Oé-Cusse to’o distritu Kupaun iha domingo 4 dezembru 2022 ne’e.
Entretantu, atleta Adelaide Catarina Colo moris iha Oé-Cusse loron 30 abril 2010, hosi aman Hironimu Colo, no inan Anastasia Teme. Atleta daudaun ne’e hala’o hela nia estudu iha eskola pre-sekundáriu Santo António Oé-Cusse.
Jornalista: Abílio Elo Nini
Editór: Rafael Ximenes de A. Belo
