Estudante 1.689 hosi Baucau sai benefisiáriu ba bolsa méritu
BAUCAU, 12 dezembru 2022 (TATOLI) – Estudante hamutuk na’in-1.689 hosi eskola 363 komposta hosi ensinu báziku no sekundária jerál iha munisípiu Baucau sai benefisiáriu bolsa méritu hosi Ministériu Edukasaun, Juventude no Desportu (MEJD).
Diretór Servisu Munisipál Edukasaun Baucau, Augosto Ornai Ximenes, esplika, programa refere nu’udar programa governu liuhosi MEJD ne’ebé sei oferese bolsa ka apoia orsamentu ba estudante ne’ebé hetan valór di’ak.
“Nível ensinu báziku kada eskola sei foti estudante na’in-lima hosi primeiru to’o terseiru klasifikadu no nível nasionál sei foti estudante na’in-tolu iha kada eskola atu hetan bolsu méritu,” nia informa ba Agência TATOLI iha Vila Nova, segunda ne’e.
Objetivu hosi bolsa méritu refere bele fasilita estudante sira atu trata sira-nia nesesidade liga ho eskola hanesan farda, livru ou kadernu no hanesan insentivu hosi governu atu motiva estudante sira iha prosesu aprenizajen.
Kritériu importante hanesan ensinu báziku maihosi estudante terseiru siklu kuartu-anu, segundu siklu sestu-anu no terseiru siklu nonu-anu ne’ebé eskola mak sei eskolla no prosesa rekapitulasaun dadus submete ona ba ministériu.
Totál estudante iha Baucau ne’ebé sai benefisiáriu komposta hosi ensinu báziku primeiru siklu kuartu-anu hamutuk eskola 150, benefisiáriu na’in-750, segunda siklu sestu-anu hamutuk eskola 131, benefisiáriu na’in-655.
Enkuantu ensinu báziku terseiru siklu nonu-anu totál eskola hamutuk 44 no benefisiáriu na’in-132.
Benefisiáriu ba ensinu báziku sekundária jerál desimu segundu-anu ne’ebé tuir ezame nasionál hamutuk eskola 14 ho tótal benefisiáriu na’in-42.
Eskola tékniku vikasionál desimu segundu-anu ne’ebé tuir ezame nasionál hamutuk eskola 5 ho totál benefisiáriu estudante na’in-15.
Sekundária jerál desimu primeiru-anu hamutuk eskola 14 no benefisiáriu estudante na’in-70 no eskola tékniku vokasionál hamutuk eskola 5, benefisiáriu na’in-25.
“Espera katak programa ne’e la’ós insidentál maibé iha sustentável atubele motiva estudante sira iha prosesu aprenizajen,” Augosto Ornai akresenta.
Hosi tótal benefisiáriu refere, sei aloka orsamentu hamutuk $ 921.150 ne’ebé kada benefisiáriu sei iha direiru valór orsamentu diferente bazeia ba valór klasifikasaun.
Jornalista : Natalino Belo
Editór : Evaristo Soares Martins
