Estudante 5.828 iha Baucau pasa ezame nasionál
BAUCAU, 12 dezembru 2022 ( TATOLI) – Estudante finalista hosi ensinu báziku no sekundária hamutuk na’in-5.828 iha munisípiu Baucau pasa iha ezame nasionál tinan ne’e.
Hosi númeru refere komposta hosi estudante báziku hamutuk na’in-3.308 ne’ebé auzente na’in-15 nune’e aprovadu hamutuk na’in-3.293.
Ensinu sekundária jerál na’in-2.555 komposta hosi programa siénsia teknolojia 1.193, auzente na’in-haat no aprovadu hamutuk 1.189, programa siénsia sosiál umanidade hamutuk 1.124, auzente 16 no aprovadu na’in-1.108 no tékniku vokasionál aprovadu hamutuk 238.
“Ita-nia rezultadu pozitivu, kuaze finalista sira tuir ezame aprovadu hotu hosi tótal estudante ne’ebé relata ona,” Diretór Servisu Munisipál Edukasaun Baucau, Augosto Ornai Ximenes, informa ba Agência TATOLI iha Vila Nova, segunda ne’e.
Edukasaun Baucau sentE urgullu tanba rezultadu refere halao korresaun sistema ne’ebé maihosi valór reál komposta hosi pursentu 50 hosi ezame nasionál no pursentu 50 hosi ezame periódika ne’ebé rezulta estudante finalista iha Baucau aprovadu 100%.
Antes ne’e rezultadu ezame nasionál anunsia iha loron-9 no nível munisipál iha loron-10 fulan-dezembru nune’e ohin realiza iha fatin realizadora hodi fahe envelope ba kada estudante.
Ministériu Edukasaun Juventude no Desportu seidauk fó-sai valór estudante iha nível nasionál tanba realasiona ho bolsu méritu nune’e presiza despaxu hosi ministériu bazea ba valór reál hosi ezame nasionál.
Jornalista : Natalino Belo
Editór : Evaristo Soares Martins
