Governu deside ajente administrasaun públika hetan pagamentu estraordináriu saláriu adisional
DILI, 12 dezembru 2022 (TATOLI)— Governu liuhosi reuniaun estraordináriu Konsellu Ministru (KM), segunda ne’e, halo ona aprovasaun ba alterasaun diploma pagamentu ba saláriu adisionál fulan-ida nian (décimo terceiro/gaji 13)).
Ezekutivu sira halo alterasaun ne’e, hafoin rona no simu komunikasaun husi Prezidente Repúblika, José Ramos Horta, nune’e Konsellu Ministru, halo alterasaun, ne’ebé mantein nafatin ein jerál diploma inisiál husi loron 9 fulan-novembru ho prinsipiu universalidade no aumenta tan ho kontratadu sira hotu, la haree ba nasionál ka internasionál.
Notísia relevante: Prezidente Repúblika husu ajusta buat balun iha saláriu désimu terseiru
“Ohin, Konsellu Ministru halo ona aprovasaun ba alterasaun diploma pagamentu estraórdinariu ba saláriu adisionál fulan ida nian ne’ebé mantein nafatin diploma ne’ebé aprova ona iha loron 09 novembru 2022,” Ministru Prezidensia Konsellu Ministru, Fidelis Manuel Leite Mangalhães, hateten, iha Palásiu Governu Dili, segunda ne’e.
Valór pagamentu estraordináriu ekivale ba valór saláriu mensál benefisiáriu nian ba fulan-dezembru tinan 2022. Maibé hodi uniformiza valór pagamentu estraordináriu entre traballadór sira iha Administrasaun Públika, sei estabelese limite tuir ekiparasaun ba rejime jerál.
Ho nune’e, pagamentu ba traballadór sira Administrasaun Públika nian, nasionál ka estranjeiru, ne’e limitadu ba valór grau no eskalaun másimu tabela salariál kareira rejime jerál nian ka ba valor vensimentu ba ajente administrasaun públika ne’ebé kontrata ba ezersisiu kargu diretór-jerál nian.
Governu halo ona alterasaun ho bazeia ba hanoin no sujestaun hosi Prezidente Repúblika no sei haruka fila-fali ba Prezidente Repúblika, iha semana ne’e, hodi halo promulgasaun.
Notísia relevante: Governu aprova pagamentu estraordináriu saláriu adisionál ba ajente administrasaun públika
Jornalista : Arminda Fonseca
Editór : Florencio Miranda Ximenes
