Governu halo pagamentu subsídiu $200 ba uma kain 6.572 iha Suai
COVALIMA, 12 dezembru 2022 (TATOLI)–Governu liuhosi Ministériu Solidariedade Sosiál no Inkluzaun (MSSI) hahú halo pagamentu ba subsídiu fim do ano $200 ba uma kain hosi suku lima iha postu administrativu Suai, munisípiu Covalima hamutuk 6.572.
“Ohin Governu hahú halo ona pagamentu subsídiu fim do ano ba komunidade iha postu administrativu suai ne’ebé iha suku-lima ho totál dadus uma kain 6.572 iha munisípiu Covalima,” Administradór postu administrativu Suai, Luzino do Rego, hateten ba jornalista sira iha sede suku Debos, segunda ne’e.
Bazea ba oráriu pagamentu subsídiu iha suku Debos durante loron sia (9) maibé depende mós halo pagamentu ba uma kain sira, tanba pagamentu subsídiu fim do ano $200 diferensa ho pagamentu subsídiu COVID-19.
Razaun pagamentu subsídiu fim do ano diferensa tanba sei prenxe deklarasaun iha membru uma-kain nia rendimentu mensál labele liu $500.00 no hasai fotografia.
Pagamentu subsídiu fim do ano iha postu administrativu Suai, suku Debos ho totál benefisiáriu ne’ebé aprova hosi nasionál 2.157 ho totál orsamentu $431,400 hahú iha aldeia Ahinarai hafoin kontinua iha aldeia sira seluk ne’ebé pertense ba suku Debos.
Suku lima ne’ebe pertense ba iha postu administrativu Suai mak hanesan suku Debos, Suai Loro, Camanasa, Labarai no suku Beco ho totál benefisiariu 6.572.
Tuir dadus jerál hosi Banku Nasionál Komérsiu Timor-Leste (BNCTL, sigla portuges) benefisiáriu iha munisipiu Covalima hamutuk na’in-20.243 ne’ebé kompostu hosi postu administrativu Suai 6.572, Zumalai 4.440, Tilomar 2.569, Maucatar 3.227, Fatululik 773, Fatumea 1.041 no Fohorem 1.621.
Jornalista : Celestina Teles
Editór : Cancio Ximenes
