DILI, 12 dezembru 2022 (TATOLI)—Xefe suku Bemori, Cristalina Pereira Soares de Oliveira, informa komunidade iha suku Bemori hamutuk 5.005 seidauk simu cesta bázika.
Notísia Relevante: Komunidade na’in-4.977 iha suku Bairru-Pité simu ona Cesta Bázika
Komunidade 5.005 ne’ebé seidauk simu cesta bázika kompostu hosi aldeia Babaliurai Leste ho totál abitante 1.035, Babaliurai Oeste 606, Bemori Centrál 911, Ailele Hun 521, Has Laran 635, Centro 824 no aldeia My Friend ho totál abitante hamutuk 473.
“Cesta Bázika ba ami-nia seidauk simu ho totál abitante hamutuk 5.005. Ho ida-ne’e mak ami mós hakarak husu fali ba ita-boot sira, ami hakarak hatene, tanba cesta bázika ami hosi postu administrativu Na’in Feto nian só simu ona hosi suku Griceng Four ho suku Lecidere. Maibé suku haat (4) ne’e seidauk rona to’o agora no ami mós hakarak hatene, tanbasá to’o agora ami seidauk iha informasaun atu ami mós simu cesta bázika,” Cristalina Pereira Soares de Oliveira hateten ba Agência Tatoli iha nia kna’ar fatin, segunda ne’e.
Tanba, nia dehan, komunidade sempre husu autoridade lokál maibé só hateten agora simu tiha lai subsídiu fim do ano $200 ba uma kain mak hodi hein fali cesta bázika, maibé to’o agora seidauk iha informasaun ida to’o iha autorkidade lokál Bemori nia tilun.
Aleinde ne’e, nia mós husu ba empreza sira-ne’ebé manán konkursu atu distribui cesta bázika ba suku Bemori, tenke aprezenta an nune’e hodi hatene produtu lokál saida mak atu distribui ba komunidade.
“Ha’u husu ba kompañia sira, bainhira atu fahe cesta bázika, sira tenke mai aprezenta sira-nia an mai ami atu ami hodi hatene item saida mak atu fahe ba ami-nia komunidade. Se buat ne’ebé la iha karik ami bele hato’o ba sira para fahe sasán ne’ebé di’ak. Tanba ne’e, ami husu ba kompañia sira-ne’ebé hamutuk ho ami atu haree sasán saida mak atu fahe ba komunidade, tanba ami lakohi fahe sasán ne’ebé ladi’ak no produtu lokál ne’ebé la sufisiente ka la kualidade di’ak ba ami-nia komnunidade,” nia dehan.
Kona-ba iha ona informasaun hosi postu administrativu Nain Feto ba prosesu distribuisaun, nia hateten, nia parte to’o agora seidauk iha informasaun.
“To’o agora, seidauk iha informasaunn no ami hotu sei hein informasaun hosi munisipiu mai postu no tun mai ami, atu ami hatene maibé to’o agora ami seidauk iha informasaun ida. Aleinde ne’e, ami sente cesta bázika ne’e dook loos ba ami no laiha iis ka laiha informasaun,” nia dehan.
Jornalista : Nelia Fernandes
Editór : Cancio Ximenes
