COVALIMA, 12 dezembru 2022 (TATOLI)–Governu liu-hosi Ministériu Saúde estabelese ona postu saúde komunitáriu iha suku Datolu Tolu, aldeia Natardik, postu administrativu, Fohorem, munisípiu Covalima, agora daudaun abandonadu.
“Ami sente triste Ggovernu estabelese ona postu saúde komunitária maibé laiha pesoál saúde atu hala’o servisu, nune’e postu saúde ne’e Governu abandona no pesoál sira bainhira fahe ai-moruk uza de’it sede aldeia,” Komunidade aldeia Natardik, Sancho Cardoso, hateten ba jornalista sira, iha aldeia Natardik, segunda ne’e.
Komunidade konsidera postu saúde komunitária ne’e abandona, tanba durante ne’e pesoál saúde sira la uza bainhira sira fahe ai-moruk ba komuniade uza de’it mak sede aldeia no tuir loloos Governu estabelese postu saúde atu utiliza la’ós estabelese tiha depois abandonadu.
“Durante ne’e komunidade hasoru difikuldade hanesan inan-isin rua-sira atu partu ami husi suku Dato Tolu ba sentru saúde no ba ospital mós dook, nune’e inan isin-rua sira hakotu iis iha dalan klaran,” nia informa.
Xefi suku Dato Tolu, João Agostinho Resi, hateten postu saúde komunitária ne’e konstrui iha tinan 2012, maibé to’o ohin loron laiha médiku no enfermeiru sira atu hala’o servisu no abandona nune’e postu saude komunitária ne’e hahú aat ona.
Tuir nia, ida-ne’e fó impkatu ba inan isin-rua sira atu partu, nune’e inan isin-rua na’in-rua ka tolu, labele salva sira-nia vida tanba komunidade hulan lori ba iha sentru saúde Fohorem mós dook atu lori ba munisípiu tenke ultra pasa mota Tafara
“Kona-ba problema ne’e ha’u nu’udar líder komunitária konfirma ona servisu saúde munisípiu Covalima, maibé sira hatán katak ita-nia pesoál saúde sira mak la to’o atu koloka sira,” nia hateten.
Jornalista : Celestina Teles
Editór : Cancio Ximenes
