Ministru Negósiu Estranjeiru Malázia simu PR Horta ho parade militár

DILI, 12 dezembru 2022 (TATOLI)—Prezidente Repúblika (PR), José Ramos Horta, domingu ne’e, hamutuk ho delegasaun to’o ona Malázia hodi hala’o vizita Estadu durante loron ida iha Kuala Lumpur.
Notísia Relevante: PR Horta atende konvite PM Anwar Ibrahim vizita Malázia
PR Horta ho delegasaun to’o iha Aeroportu Internasionál Malázia iha tuku 19h00-resin, ne’ebé simu hosi Ministru Negósiu Estranjeiru Malázia, Zambry Abdul Kadir ho parade militár.
“Tuir ajenda, segunda (12/12) ne’e, Xefe Estadu sei hasoru malu ho Liurai no Primeiru-Ministru Malazia,” refere komunikadu imprensa ne’ebé Agência Tatoli asesu, segunda ne’e.
Delegasaun ne’ebé akompaña Xefe Estadu ba Malázia hamutuk ema na’in-10 inklui Ministra Negósiu Estranjeiru no Kooperasaun (MNEK), Adalzija Magno no Ministru Koordenadór Asuntu Ekonómiku (MKAE), Joaquim Amaral.
Vizita Estadu ne’e akontese, tanba solisita direta hosi Primeiru-Ministru Malázia, Anwar Ibrahim no Liurai Boot, Abdullah de Pahang iha loron 10 fulan-dezembru 2022, bainhira halo hela vizita traballu iha Singapura.
Molok vizita Malázia, Xefe Estadu infoma ona ajenda ne’e bá Prezidente Parlamentu Nasionál Aniceto Longuinhos Guteres Lopes no Primeiru-Ministru Taur Matan Ruak.
Tuir Planu, PR Horta sei fila-fali mai Timor-Leste, segunda ne’e, hodi tranzita liuhosi Bali (Indonézia) no to’o hikas iha Díli iha loron 13 dezembru 2022.
Jornalista : Nelson de Sousa
Editór : Cancio Ximenes

