PN informadu PR Horta hala’o viajen ba Malázia

DILI, 12 dezembru 2022 (TATOLI)—Parlamentu Nasionál (PN) informadu ona kona-ba Prezidente Repúblika (PR), José Ramos Horta, hala’o viajen ba Malázia hodi atende konvite hosi Primeiru-Ministru (PM) foun Malázia, nune’e la presiza fó konsentimentu.
Notísia Relevante: PR Horta atende konvite PM Anwar Ibrahim vizita Malázia
Prezidénsia Repúblika liuhosi Kaza Sivíl hato’o ba Prezidente PN asuntu extensaun estadia PR iha exteriór responde ba konvite pesoál hosi PM foun Malásia, tanba loloos PR Horta nia viajen Estadu ba Singapura ramata fila mai Timor-Leste iha loron 11 dezembru ne’e, nune’e husu atu extende aumenta loron rua iha exteriór hodi dezloka ba Kuala Lumpur no iha segunda 912/12) ne’e espera fila mai Timor-Leste iha tersa ka kuarta depende ba kondisaun voo.
Ho sirkunstánsia ne’e solisita ba PN extende estadia PR iha diáspora to’o loron 14 dezembru 2022.
Maibé liu hosi reuniaun plenária, Deputadu sira maiória hato’o observasaun katak haree konvite hosi Xefe Governu Malázia ba PR ne’e hanesan konvite pesoál, nune’e la presiza fó konsentimentu.
“Hosi ita bo’ot Deputadu sira nia opiniaun sira-ne’e no Prezidente Parlamentu lori plenária Parlamentu nia naran halo pronunsiamentu ho konteúdu hanesan ne’e katak Parlamentu está informadu,” Prezidente PN, Aniceto Longuinhos Guterres Lopes, hateten iha sala plenária, segunda ne’e.
Tanba ne’e, nia dehan, Deputadu sira pronúnsia no Prezidente Repúblika hanesan informa de’it ita la presiza fó konsentimentu extensaun estadia, maske nia hosi plenária ne’e Prezidente Parlamentu tenke pronúnsia kona-ba informasaun refere.
Deputadu CNRT, Arão Noe, hateten tuir konstituisaun iha artigu 80 númeru 3 mak la presiza fó konsentimentu.
“Haree ba artigu 80 númeru 3 no haree mós karta ne’ebé mai ho konteúdu konvite pesoál, hanoin viajen ne’e la’ós ofisiál tanba la prevee autorizasaun konsentimentu, hanoin ne’e hanesan informasaun ida tuir interpretasaun artigu ne’e,” nia hateten.
Deputadu Fretilin, Antonino Bianco, sekunda mós katak la presiza PN nia autorizasaun ba viajen privadu ne’ebé la to’o loron 15 maibé molok halo viajen ne’e PR tenke fó hatene uluk ba PN.
“Tanba viajen privadu hetan konvite privadu iha tempu ne’e bele ko’alia asuntu hanesan ita-nia interrese Estadu, tanba ne’e la presiza ita fó autorizasaun ho rezolusaun no konstituisaun autoriza tiha ona,” nia esplika.
Jornalista : Nelson de Sousa
Editór : Cancio Ximenes

