Povu suku Matahoi hahú simu subsídiu $200
VIQUEUQUE, 12 dezembru 2022 (TATOLI)— Populasaun suku Matahoi, Postu administrativu Uatulari, Munisípiu Viqueque, segunda ne’e hahú ona simu subsídiu $200.
Xefe suku Matahoi, Antonio Amaral, hateten pagamentu subsídiu findu ano ba família agregadu hosi suku ne’e hahú pagamentu iha tuku 13:00 OTL ba benifísiariu sira hosi aldeia Iraler.
“Ohin ami hamutuk ho estutura suku ba simu osan iha Postu Administrativu Uatolari iha Banku Nasionál Komersiu Timor-Leste (BNCTL-sigla portugés). Nune’e agora ami halo hela pagamentu ba família uma-kain hosi aldeia Iraler depois kontinua ba aldeia seluk”, autoridade lokál ne’e hateten ba jornalista sira, iha suku Matahoi, segunda ne’e.
Familia uma-kain hosi suku Matahoi totál populasaun iha 1.344, ne’ebe mai hosu aldeia 12. Pagamentu findu ano hahú hosi aldeia Iraler ne’ebé hela iha foho ho totál uma-kain 183.
“Iha pagamentu subsídiu findu ano ne’e ha’u husu ba abitante benifísiariu sira uza osan $200 hodi sustenta ba nesesidade nesecidade familia uma laran, la’os simu tiha sira uza fali ba buat seluk,” nia husu.
Iha fatin hanesan Ofisial Polísia Suku, Suku Matahoi, Lorenço Soares, hateten, nudar reprezenta Polísia Nasionál Timor Leste (PNTL) Uatulari husu ba populasaun sira atu simu subsidiu findo ano bandu halo barullu durante iha prosesu pagamentu.
“Ha’u husu ba benifísiariu sira, atu simu subsídiu tenke hakmatek labele halo barullu ruma iha laran”, nia apela.
Prosesu pagamentu findu ano $200 iha suku Matahoi,halo hosi tezoreira suku Matahoi, sekretariu suku, akompaña funsionáriu Ministeriu Solidaridade Sosial no Inkluzasaun (MSSI) Viqueque no hetan asistensia seguransa hosi PNTL eskudra Uatulari.
Jornalista : Vitorino Lopes da Costa
Editóra : Armandina Moniz
