VIQUEQUE, 12 dezembru 2022 (TATOLI)— Reprezentante Administradór Munisípiu Viqueque, Cosme Sarmento, husu ba povu benifísiariu subsídiu famíliar iha munisípiu Viqueque ne’ebé simu subsídiu findo ano tenke uza ba nesesidade uma laran la’ós uza ba joga.
“Pagamentu subsídiu ida-ne’e ha’u husu ita-nia povu sira tenke uza ba nesesidade famíliar la’os uza ba jogu fali”, repreprezentante autoridade ne’e hateten ba Agência TATOLI, hafoin lansamentu pagamentu subsídiu findu ano munisípiu Viqueque nian, iha Sentru Evakuasaun, Postu Viqueque Villa, segunda ne’e.
Nia dehan, osan findo ano atu hadia ekonómia agregadu família sira hodi uza ba nesesidade iha tempu loron bo’ot natal.
“Família sira simu osan $200 ne’e labele lori ba joga. Osan ne’e sosa hahan ruma hodi han hamutuk ho ita-nia família uma laran. Tanba objetivu osan ida-ne’e atu reforsa família sira nia nesesidade uma laran,” nia explika.
Konseilu Ministru aprova ona projetu dekretu Lei númeru 37/2022, 25 Maiu kona-ba subsidiu findo ano ka subsídiu prezente Natal ho valór $200 kada familia Uma-kain.
Atu prevene no evita dezintendementu nia dehan, Administrador Munisípiu Viqueque fó ona orientasaun ba Administrador Postu Administrativu no xefe Suku sira hodi organiza Komunidade hodi kumpri rekizitus sira tuir regras legal kona-ba simu pagamentu subsidiu findo ano ne’e.
Tuir orariu pagamentu subsídiu findo ano munisípiu Viqueque ba Postu Administrativu lima. “Ohin pagamentu ba Postu Administrativu Uatolari no Uatocarbau no Postu Administrativu Viqueque Villa. Tuir fali, Postu Administrativu Lacluta sei halo iha loron 13 dezembru no pagamentu ba povu iha Postu Administrativu Ossu sei simu halo loron 14 dezembru 2022.
Nune’e mos, Diretór Serbisu Ministeriu Solidariedade Sosial no Inkluzaun (MSSI) munisípiu Viqueque, Paulo Menezes, hateten, pagamentu subsídiu findo ano munisípiu Viqueque nian ba postu tolu agora hahú halo ona pagamentu.
“Ohin munisípiu Viqueque hahú halo pagamentu ba postu tolu hanesan Postu Administrativu Viqueque Villa, Uatulari no Uatucarbau. Kona-ba dadus benifísiariu Viqueque nian ha’u ladun hatene ne’e diresaun nasionál maka hatene,” nia dehan.
Serimónia lansamentu subsídiu findo ano munisípiu Viqueque lansa ofisial hosi reprezentante administradór munisípiu Viqueque, Cosme Sarmento ne’ebé akompaña hosi ekipa MSSI nasionál no munisípiu Viqueque.
Jornalista :Vitorino Lopes da Costa
Editóra : Armandina Moniz
