BAUCAU, 13 dezembru 2022 (TATOLI) – Autoridade admistrasaun munisipál Baucau, tersa ne’e lansa asosiasaun vendedór ho objetivu akumula hanoin negosiante sira iha merkadu.
Prezidente Autoridade Munisipál (PAM) Baucau, Olivio ‘Bou Lesa’ Freitas, hato’o votu parabéns ba estrutura eleitu hotu no husu atu esforsu maka’as hodi estabelese kondisaun hotu hodi akumula negosiante feto inklui kria merkadu saudável iha futuru.
“Ita hotu mai hamutuk hodi aprezenta ba públiku kona-ba prekupasaun hosi vendedór sira-ne’ebé durante laiha asosiasaun ruma hodi sai mohon ba luta hodi fa’an sasan durante tinan barak,” Prezidente Autoridade Munisipál (PAM) Baucau hateten iha Sentru Konvesaun Baucau (CCB,;sigla portugés).
PAM husu entidade inklui organizasaun no parseiru dezenvolvimemtu hotu atu kontinua luta kontra violénsia hasoru feto no labarik feto, hahú hosi uma-laran too fatin públiku hanesan kria kondisaun merkadu saudável.
Autoridade Munisipál Baucau husu ba parseiru dezenvolvimemtu hanesan UN Women, TOMAK no KOICA atu kontinua apoia asosiasaun vendedór merkadu Baucau hodi hasa’e koñesimentu hanesan fasilita formasaun.
“Hahú ohin sei integra asosiasaun ida-ne’e iha enkontru nível altu sira hodi rona aspirasaun no konsidera iha planu asaun anuál munisípiu Baucau,” Bou-Lesa akresenta.
Prezidente Asosiasaun Vendedór Merkadu Baucau, Daniel Soares dos Santos, kompromete sei akumula aspirasaun vendedór hotu iha munisípiu refere, liuliu fó prioridade ba negosiante lokál atu hadi’a ekonomia uma-laran.
“Ami hakarak hato’o ba governu liuhosi asosiasaun hodi kria lei hodi proteje ba negosiante rai-laran,” Daniel Soares hateten.
Asosiasaun Vendedor Merkadu Baucau maihosi inisiativa negosiante Baucau oan ho objetivu atu akumula hanoin hodi hato’o ba institusaun relevante nune’e bele tulun hasa’e koñesimentu iha área negósiu.
Durasaun estrutura períodu dahuluk hahú iha tinan-2022 to’o 2025 ne’ebé sei akumula negosiante hamutuk 898 inklui negosiante ambulante hosi postu administrativu no suku, no tuir planu sei konsentra iha tipu negosiante hamutuk 13 iha merkadu Tuanau, Vila Nova.
Jornalista : Natalino Belo
Editór : Evaristo Soares Martins
