KUPAUN, 13 dezembru 2022 (TATOLI) – Prezidente Autoridade Rejiaun Administrativa Espesiál Oé-Cusse Ambeno (RAEOA), Arsénio Paixão Bano, tersa ne’e, atribui sertifikadu apresiasaun ba atleta Taekwondo hamutuk 13, tanba hamorin ona Oé-Cusse no Timor-Leste nia naran liuhosi eventu Kepala Kejaksaan Tinggi (KAJATI) durante loron tolu iha salaun desportu distritu Kupaun, provínsia Nusa Tenggara Timur (NTT), Repúblika Indonézia.
“Bemvindu, ohin fila-fali mai ita-nia rai ho saúde di’ak, ha’u agradesu ba imi hotu nia esforsu tanba ohin fila mai hetan rezultadu, ha’u kontente tebes, imi reprezenta Oé-Cusse no Timor-Leste, hatudu duni imi kontribuisaun ida maka’as tebes, Timor-Leste konsege lori medalla barak tebes, Oé-Cusse kontribui 13. Ida-ne’e orgullu ba Timor-Leste,” Arsénio hato’o felisitasaun ne’e iha Gabinete ZEESM Oé-Cusse.
Notísia relevante: Abertura eventu KAJATI, Governadór NTT husu atleta 845 hatudu esportiva no amizade
Nune’e hanesan Prezidente Autoridade apoiu ne’ebé oferese ona atleta sira atu kompete iha eventu KAJATI, karik la sufisiente maibé iha futuru bele koordena didi’ak, liuliu ba fasilidade no no nesesidade durante iha partisia iha kompetisaun, RAEOA prontu sei fasilita tán.
Prezidente Autoridade ne’e agradese mós ba treinadór no família tanba bele akompaña atleta sira iha durante kompetisaun, hodi enkoraja sira, atu hatudu sira-nia vontade iha kompetisaun refere.
Treinadór Roger de Fátima, reprezenta Asosiasaun Taekwondo Oé-Cusse, agradese ba Autoridade RAEOA, tanba bele fó apoiu másimu ba atleta sira hodi reprezenta Oé-Cusse pastisipa kompete iha eventu KAJATI, NTT durante loron tolu.
Notísia relevante: Taekwondo RAEOA fila hosi eventu KAJATI ho medalla 13
Jornalista: Abílio Elo Nini
Editór: Evaristo Soares Martins
