Governu utiliza postu saúde Natardik ba atividade SISCA-Mobile klinika
COVALIMA, 13 dezembru 2022 (TATOLI)–Diretora Servisu Saúde Munisípiu Covalima Maria de Fátima Moniz, klarifika postu saúde iha aldeia Natardik, suku Dato Tolu, postu administrativu Fohorem, munisípiu Covalima ne’e la’ós Governu abandona maibé pesoál saúde-sira uza ba atividade SISCA no mobile klinika.
Notísia Relevante: Komunidade triste Governu abandona postu saúde komunitária iha Natardik
“Ha’u atu klarifika katak estabelesimentu postu saúde iha Natardik, ida-ne’e pesoál saúde sira uza bainhira hala’o atividade mobile klinika noSISCA ne’ebé fulan-ida dala ida la’ós atu responde hanesan postu saúde sira,” Maria Fátima Moniz informa ba Agência Tatoli lihosi telefónika, tersa ne’e.
Tuir planu, hosi governu liuhosi Ministériu Saúde (MS) kada suku estabelese postu saúde ida, tanba ne’e mak estabelese iha suku Dato Tolu, aldeia Natardik hanesan pesoál saúde sira atu ba halo atividade SISCA no mobile klinika.
Durante ne’e, pesoál saúde sira la uza postu saúde iha aldeia Natardik, suku Dato Tolu, postu administrativu Fohorem ho razaun pesoál saúde sira la uza tanba la halo atividade SISCA no mobile klinika.
Postu saúde komunitária iha aldeia Natardik konstrui hosi Progama Nasionál Dezenvolvimentu Suku (PNDS) atu responde ba iha atividade SISCA no mobile klinika ba komunidade.
Antes ne’e, iha segunda (12/12) ne’e, komunidade hosi aldeia Natardik, suku Dato Tolu, postu administrativu Fohorem sente triste tanba Governu estabelese ona postu saúde komunitária maibé dadaun ne’e abandonadu.
Dadus ne’ebé Agência Tatoli asesu hosi servisu saúde munisípiu Covalima hatudu katak, Governu liuhosi Ministériu Saúde estabelese ona postu saúde 24 iha munisípiu Covalima maibé sei menus rekursu umanu.
Jornalista : Celestina Teles
Editór : Cancio Ximenes
