DILI, 13 dezembru 2022 (TATOLI)—Koordenadór Jestaun Merkadu Taibesi, António Manuel de Araújo, preokupa ho vendedór sira-ne’ebé la kumpre ba orientasaun atu labele faan iha fatin ne’ebé la merese atu faan sasán iha merkadu Taibesi.
Notísia Relevante: Jestór preokupa empreza la raut lixu iha merkadu Taibesi
“Ita-nia negosiante sira-ne’ebé halo atividade iha terminál laran, ha’u ho ha’u-nia membru jestaun merkadu sempre haree nafatin sira faan sasán iha laran no halo prevensaun ba sira, maibé sira kontinua obriga sira-nia an mai faan iha fatin ne’ebé ita bandu, hanesan iha terminál laran no trotoár leten. Hosi ne’e, ha’u ho membru sira sempre fó hanoin nafatin maibé ita kuandu muda sira, depois iha óras meudia, sira uza tempu ida-ne’e sira mai fali.” António Manuel de Araújo hateten ba Agência TATOLI iha ninia kna’ar fatin, Merkadu Taibesi, tersa ne’e.
Jestór ne’e hateten, sira-nia parte preokupa tebes ho kondisaun sira-ne’e no bainhira iha tempu lorokraik servisu sai no sira fila ba uma, vendedór sira aproveita tempu faan iha fatin proibidu sira maske iha pesoál seguransa.
“Hanesan membru jestaun merkadu iha kalan ne’e, ita iha tuku 17h50 husik ona servisu, entaun iha parte seguransa kalan nian mai haree fali servisu, sira tenke nakonu ona iha laran. Tanba sira haree fora de servisu, sira mai faan fali sasán iha laran ne’e. Ida-ne’e mós hanesan preokupasaun nafatin ba jestaun merkadu, tanba laiha sansaun forte ida ba sira, nune’e sira bele abitua tiha sira-nia fatin ida-ne’e,” nia dehan.
Kona-ba implementasaun órariu ba vendedór sira hanesan merkadu Manleu, jestór ne’e hateten, ida-ne’e presiza estudu ruma hafoin bele realiza no kompeténsia tomak iha Autoridade Munisípiu Dili (AMD) nia liman.
“Kona-ba órariu ida-ne’e, ita presiza estudu ida kle’an para ita bele halo órariu ida-ne’e, maibé ita presiza haree iha tempu ne’ebé presiza ita haree didi’ak. Tanba, ida-ne’e kompeténsia tomak iha Prezidente munisípiu mak bele haree. Hanesan, ha’u só kontinu haree ha’u-nia servisu ne’ebé maka la’o tiha ona,” nia dehan.
Hosi ne’e, nia parte espera Autoridade Munisípu Dili (AMD) bele toma atensaun makaas ajuda sira-nia servisu, nune’e merkadu Taibesi bele mós hanesan merkadu Manleuana.
“Merkadu Manleu no merkadu Taibesi merkadu ne’e ida de’it, merkadu nasionál Dili nian. Bainhira merkadu Taibesi uza iha tinan 2014, merkadu ne’e la’o tiha hanesan ne’e ona. Agora Manleu la’e, momentu ne’ebá fó solusaun iha ona útiliza ba vendedór sira-ne’e limita ona, sira óras loke no oras taka, entaun iha tempu kalan merkadu Manleu ne’e seguru, la hanesan Taibesi. Momentu 2014 loke ne’e kontinua ema bazar kalan no bazar loron. Agora Munisípiu Dili só hanoin atu haree ba oin, oinsá atu ita bele organiza merkadu Taibesi ne’e hanesan merkadu Manleu,” Koordenadór ne’e sujere.
Nia informa, pesoál seguransa ne’ebé koloka iha merkadu Taibesi ne’e hamutuk 24, kompostu hosi ekipa limpeza, pesoál seguransa loron no kalan.
Jornalista : Nelia Fernandes
Editór : Cancio Ximenes