DILI, 13 dezembru 2022 (TATOLI)—Prezidente Repúblika (PR), José Ramos Horta ho Primeiru Ministru (PM), Malázia, Anwar Ibrahim, segunda (12/12/) ne’e, hasoru malu iha Malázia hodi diskute atu hametin relasaun bilaterál entre rai rua.
Notísia Relevante: PR Horta atende konvite PM Anwar Ibrahim vizita Malázia
“Enkontru traballu ho Primeiru-Ministru, Anwar Ibrahim ho ministru seluk haree avaliasaun relasaun bilaterál Timor ho Malázia kle’ur ona di’ak.” Xefe Estadu ne’e hateten ba jornalista sira liuhosi konferénsia imprensa iha aeroportu internasionál Nicolau Lobato hafoin hala’o vizita Estadu ba Singapura no vizita traballu ba Malázia, tersa ne’e.
Durante sorumutu ne’e, Xefe Estadu ho Xefe Governu Malázia ko’alia oinsá aumenta investidór hosi Malázia mai investe iha Timor-Leste iha área importante sira hodi apoiu dezenvolvimentu nasaun ne’e.
“Haree oinsá atu aumenta investór barak lubun ida iha Malázia interresadu loos atu mai iha ne’e, la’ós agora de’it fulan hira nia laran ona sira halo kontaktu oioin sira buka atu halo investimentu inklui iha área enérjia, transporte marítimu, agrikultura buat sira-ne’e hotu sira hakarak haree,” nia dehan.
Laureadu Prémiu Nobel ba Pás ne’e hateten, nia parte halo amigu no relasaun di’ak no forte tebes ho Primeiru-Ministru Malázia foun ne’e.
“Ho Primeiru-Ministru Ibrahim tanba koñese nia di’ak ho nia tinan lubun nia laran, relasaun di’ak ho mós nia família no kolega sira hotu iha Governu, sira sei haree oinsá bele foti relasaun ida-ne’e sai relasaun espesiál ida di’ak,” Ramos Horta hateten.
Tuir Horta, tanba uluk kedas Governu dahuluk nian Primeiru-Ministru Malázia Mahatil mai ona vizita iha Timor-Leste hanesan lidér Asean dahuluk.
“Mai iha ne’e fó apoiu ba ita primeiru mak ekipamentu militár F-FDTL mai hosi Malázia no antes ita seidauk independénsia sira ajuda ona,” nia hateten.
Purtantu, Xefe Estadu konsidera vizita traballau ka vizita privadu ne’e rezultadu di’ak oinsá buka hametin liután relasaun entre nasaun rua.
Biban hanesan, PR Horta hala’o mós enkontru ho liurai Malázia maske Liurai iha ajenda hanesan baibain lori fulan lubun ida mak prepara, maibé nia muda kedas nia programa simu Prezidente Horta ho delegasaun.
Jornalista : Nelson de Sousa
Editór : Cancio Ximenes
