Servisu konservatóriu Baucau menus rekursu umanu
BAUCAU, 13 dezembru 2022 (TATOLI) – Servisu Munisipál Konservatóriu Rejistu Baucau hasoru difikuldade iha parte rekursu umanu hodi hala’o atendimentu públiku.
Diretór Servisu Munisipál Konservatóriu Rejistu Baucau, Marcelino Gama, esplika, funsionáriu atu atende komunidade ne’ebé trata dokumentu indentidade hanesan Billete Identidade (BI), sertidaun nasimento, kazamentu no óbitu, maibé rekursu umanu mak la sufisiente.
Alende ne’e, difikuldade seluk menus ekipamentu hanesan mákina printer, kamera inklui komputadór no kondisaun edifísiu ne’ebé la sufisiente.
“Maske neineik maibé komunidade ne’ebé presijñza ami emprime maibé kontinua asegura mákina no iha fungsionáriu na’in-ida de’it mak responsável ba servisu hotu kartaun BI,” Diretór Serbisu Munisipál Konservatóriu Rejistu Baucau hateten iha Vila Nova, tersa ne’e.
Maske nune’e prosesu atendimentu kontinua la’o ho normál tuir kalendáriu ne’ebé fahe kada loron hanesan segunda to’o tersa halo foun BI, kuarta emprime, enkuantu iha loron kinta no sesta halo renovasaun.
Kada loron atendimentu ba komunidade ne’ebé trata dokumentu BI purvolta na’in-300 resin. Enkuantu kapasidade mákina emprime loron ida tenke emprime kartaun 400 no funsionáriu na’in-ida mak halo atendimentu.
Nune’e mos prosesu atendimentu sertidaun moris kada loron halo foun hamutuk na’in-60 iha loron segunda to’o kuarta, enkuantu kinta no sesta halo renovasaun ne’ebé iha funsionáriu nai’n-ida mak responsavél hatama dadus, verifika, hakerek iha livru asentu inklui emprime.
Parte dirijente tenke fahé oráriu ba prosesu atendimentu relasiona ho situasaun inklui hato’o proposta no aprova ona iha autoridade administrasaun munisipál Baucau atu reabilita edifísiu liuhosi orsamentu anual munisípiu.
“Ita husu mós aumenta rekursu umanu hodi halo atendimentu iha parte trata dokumentu iha BI no kiriminál nian inklui sertidaun,” Marcelino Gama akresenta.
Total funsionáriu ne’ebé halao kna’ar iha Serbisu Munisipál Konservatóriu Rejistu Baucau hamutuk na’in-10 ne’ebé fahe ba atendimentu BI no kiriminál na’in-ida, pasaporte na’in-rua no sertidaun moris na’in-ida ne’ebé apoia hosi funsionáriu kontratadu na’in-haat.
Jornalista : Natalino Belo
Editór : Evaristo Soares Martins
