DILI, 13 dezembru 2022 (TATOLI)—Ajénsia Promosaun Investimentu no Esportasaun Timor-Leste, Institutu Públiku (TradeInvest TL, I.P), iha 09 dezembru, organiza forum emprezariál Timor-Leste iha Singapura atu promove oportunidade investimentu no esportasaun.
“Objetivu hosi Forum Emprezariál ne’e atu promove oportunidade investimentu no esportasaun iha Timor-Leste, futuru planu ba konektividade no setór turizmu, projeitu infraestrutura estratéjiku liuhosi modalidade Parseria Públika Privada (PPP) no oportunidade iha setór petroleu no mineiru,” refere nota komunikadu ne’ebé Agência Tatoli asesu, tersa ne’e.
Forum emprezariál refere hala’o tanba servisu hamutuk ho Diresaun Jerál Asosiasaun Nasaun Sudeste Aziátiku (ASEAN), Ministériu Negósiu Estranjeiru no Kooperasaun (MNEK), Embaixada Timor-Leste iha Singapura, Kámara Komérsiu no Indústria (CCI-TL) Xineza no Singapura ne’ebé hetan apoiu hosi Autoridade Nasionál Petroleu no Minerál (ANPM).
Forum Emprezariál Timor-Leste ne’e rasik mós entegra ba programa no atividade vizita Xefe Estadu Prezidente Repúblika Demokrátika Timor-Leste, José Ramos Horta ba Singapura durante loron tolu, hahu hosi 8 to’o 10 dezembru.
Forum refere hetan partisipasaun másimu hosi Prezidente Repúblika José Ramos Horta, Ministru Koordenadór Assuntu Ekonómiku (MKAE), Joaquim Amaral, Ministra Negósiu Estrangeiru no Kooperasaun (MNEK), Adaljiza Magno, Embaixadora Timor-Leste ba Singapura, Embaixadór Non Rezidénsia Singapura ba Timor-Leste, Membru Parlementu Nasionál Timor-Leste, Prezidente Kámara Komérsiu no Indústria Xineza Singapura, Korpu Diplomátiku no emprezáriu Singapura no Timor-Leste ne’ebé ho totál partisipante hamutuk 140.
Jornalista : Arminda Fonseca
Editór: Florencio Miranda Ximenes
