BAUCAU, 14 dezembru 2022 (TATOLI) – Restu mortál hamutuk 510 sei haloot iha jardín eroi Daramutu, suku Soba, postu administrativu Laga, munisípiu Baucau.
Sekretáriu Jerál Konsellu Munisipál Kombatente Libertasaun Nasionál (CMCLN) Baucau, Manuel ‘Alari’ da Costa Soares, esplika, serimónia haloot restu mortál refere sei hala’o iha loron 15 dezembru, ne’ebé tuir planu sei partisipa direita hosi orgaun seberania haat Prezidente Repúblika, Parlamentu Nasionál, Governu no Tribunál Rekursu.
“Preparasaun kompletu ona, horisehik ita halo transladasaun hosi Tutugua ba Daramutu ne’ebé direitamente hala’o hosi FALINTIL-Forsa Defeza Timor-Leste,” Sekretáriu Jerál Konsellu Munisipál Kombatente Libertasaun Nasionál (CMCLN) Baucau informa ba Tatoli ha Vila Antiga, kuarta ne’e.
Tuir sekuénsia serimónia ohin hala’o misa requem ne’ebé sei partisipa hosi líder komunitária, Prezidente Autoridade Munisipál inklui família hosi saudozu sira no komunidade jerál antes loron tuir mai haloot iha jardín eroi Laga.
Membru FALINTIL-FDTL hamutuk 400 resin no PNTL hamutuk 250 mak sei envolve atu hala’o serimónia parada militár inklui fúnebre iha fatin ne’ebé preparadu ona.
Restu mortál 510 antes ne’e rekoilla hosi eis gerrileiru FALINTIL atúal Deputadu Parlamentu Nasionál Cornelio Gama ‘L7’, restu hosi Dubuwai, postu Quelicai no hosi postu Natarbora hamutuk 22 nune’e totál 643 maibé tanba kondisaun fatin mínimu nune’e deside 510 no restu 133 sei iha faze tuir mai.
Hosi 510 fahé ba kategoria tolu komposta hosi militár hamutuk 200-resin , polítiku 100-resin no sivíl 100-resin ne’ebé kargu altu mak saudozu komandante António Perreira ‘Makiku’ hosi suku Sagadati no Paulo Agapito de Sousa Gama nu’udar kolaboradór xefi estadu maiór Falintil.
“Ita haree hosi durante luta, Laga nia oan mesak komandante mak fó aan ba mate hotu hodi liberta Timor-Leste,” Alari akresenta.
Restu mortál dadaun ne’e sei haloot iha jardín eroi hotu iha territóriu Nasionál, hafoin finaliza sei kontinua ho halo monumentu iha postu administrativu hotu bainhira ruin buka lahetan hanesan parte onra no gloria ba eroi nasionál sira.
Jornalista : Natalino Belo
Editór : Evaristo Soares Martins
