Reabilitasaun sede suku 12 iha Covalima nia progresu atinje ona 6,67%
COVALIMA, 14 dezembru 2022 (TATOLI)–Diretór Programa Nasional Dezenvolvimentu Suku (PNDS), Filipe Cardoso, relata reabilitasaun sede suku 12 ne’ebé implementa iha postu administrativu Fohorem, Maucatar no Tilomar iha Covalima ninia komulativu progresu fízíku atinje ona 6,67%.
“Iha ita-nia munisípiu Covalima suku 30 no hosi númeru ne’e liga ba reabilitasaun sede suku iha faze dahuluk ita konklui ona iha suku 18. Faze daruak iha suku ualu (8) no ba faze datoluk reabilitasaun sede suku 12 ne’ebé implementa iha postu Maucatar, Tilomar no Fohorem ninia komulativu progresu fizíku atinje ona 6,67%,” Filipe Cardoso hateten ba jornalista-sira iha nia-kna’ar fatin, Sukaer Laran, kuarta ne’e.
PNDS foku liu ba projetu komunitriu signifika komunidade mak sai autór ba iha implementasaun, ho nune’e balun la’o tuir kalendáriu fulan tolu ho balun liu tanba haree ba kondisaun iklima ho tempu udan sai obtakulu kalendáriu implementasaun programa PNDS iha nivél suku.
Implementasaun PNDS kategória orsamentu hanesan fundu infraestrutura no fundu operasionál suku, ne’ebé kada suku ho nia konta bankaria rua (2) nune’e ekipa jestaun suku mak halo jestaun utiliza orsamentu sira-ne’e.
“Maibé durante ne’e, PNDS nota kestaun tékniku balun kona-ba jestaun orsamentu iha suku, hanesan ha’u foti ezemplu halo kuotasaun sira distribui kandidatu fornesedór ne’ebé prontu atu kompete no sira prenxe ikus mai sira manán no asina kontratu hodi fornese material,” nia informa.
Hafoin asina kontratu, fornsedór atu distribui materiál sira hanesan materiál fabrika, lokál no espesífiku bainhira fornesedór kumpre ona.
Kona-ba prosesu pagamentu, ekipa jestaun suku halo relatóriu gastu submete mai iha ekipa PNDS munisípiu halo verifikasaun
Razaun halo verifikasaun relatóriu atu hatene no haree didiak utiliza orsamentu hanesan parte enjiñeiru munisípiu haree kestaun tékniku, akuntabilidade haree kona-ba finansa bele aprova foin bele autoriza prosesu pagamentu.
Orsamentu reabilitasaun sede suku 12 ne’ebé implementa iha postu administrativu Fohorem, Tilomar no Maucatar transferidu ona hamutuk $144,000.00 no hosi orsamentu ne’e kada sede suku $12,000.00
Jornalista : Celestina Teles
Editór : Cancio Ximenes
