VIQUEQUE, 14 dezembru 2022 (TATOLI)— Xefe Suku Bahatata, Postu Uatucarbau, Munisípiu Viqueque, José da Silva, hateten Governu tulun ona povu hodi fo subsídiu $200 ba findu ano, tanba ne’e husu ba povu atu uza osan ne’e ba nesidade uma-laran.
“Governu tulun ona povu hodi reforsa liu tan sira-nia nesesidade loron-loron nian iha loron bo’ot ne’e. Ho ida-ne’e ha’u husu bai mi hotu ne’ebé simu osan ne’e tenke uza ba nesesidade uma laran nian, labele uza ba buat seluk”, Autoridade suku Bahatata ne’e dehan ba Agência Tatoli, liu husi telefónika, kuarta ne’e.
Nia dehan, pagamentu subsídiu $200 suku Bahatata hahú horseik agora sei kontinua halo pagamentu ba família uma-kain sira.
“Ami-nia komesa horseik hahu ona pagamentu, maibé seidauk hotu foin maka halo ba aldeia ida”, nia haktuir.
Tuir dadus família uma kain hosi suku Bahatata totál hamutuk 211, ho totál orsamentu ba família uma kain hamutuk $42.200.
Iha pagamentu dahuluk halao ba aldeia Builakurae ho tótal benifísiariu hamutuk 47 no uma-kain ida maka naran laiha lista subsídiu nune’e sai hanesan reklamante.
“Reklamentu ne’e ami nu’udar Governu nia liman ain sei hato’o hodi halo pagamentu ba ita-nia reklamente hodi bele simu ninia diretu ba subsídiu,” nia dehan.
Jornalista :Vitorino Lopes da Costa
Editóra : Armandina Moniz
