VIQUEQUE, 14 dezembru 2022 (TATOLI)— Xefe Suku Caraubalo, Postu administrativu Viqueque Villa, munisípiu Viqueque, João Pinto, konsidera apoia subsídiu $200 ne’ebe governu fó, benifísia tebes ba nesesidade familia uma laran hodi hakbit sira-nia ekonómia iha loron bo’ot Natal.
“Ha’u sente apoia subsídiu $200 hosi governu fó benifísiu tebes ba ita família uma-kain sira nian ekonómia no lori hakman komunidade sira-ne’ebé rendimentu. Apoiu ida ne’ebe governu fo ne’e diak tebes,” Autoridade suku Caraubalo ne’e hateten ba jornalista sira, iha sede suku Caraubalo, Viqueque Villa, kuarta ne’e.
Autoridade suku Caraubalo ne’e fó hanoin ba benifísiariu sira hosi suku ne’e atu utiliza subsídiu $200 ba nesesidade ne’ebé presiza liu.
“Ita-nia komunidade barak maka moris nu’udar vida agrikultura. Nune’e ha’u husu ba benifísiariu sira labele uza osan ba nesesidade sira seluk ne’ebé maka la importante hanesan ba futu manu. Governu apoia subsídiu ne’e haree ba nesesidade família sira-nia,” nia hato’o.
Suku Caraubalo hahú proses pagamentu subsidi iha segunda ne’e. Ho nune’e iha kuarta ohin aldeia haat maka simu ona subsídiu $200. Benifísiariu hosi suku Caraubalo ne’ebe direitu simu subsidiu ho totál uma-kain hamutuk 1.481.
Husi total uma kain ne’e mai hosi aldeia hitu hanesan aldeia Lari ho totál uma kain hamutuk 128, aldeia Cabira-Oan (338), aldeia Has Abut (116), aldeia Lamac Laran (126), aldeia Mamulac (281), aldeia mane haat (278) no aldeia Wessa hamutuk 216.
Iha pagamentu ne’e ekipa tekniku na’in ida no hetan apoia hosi estrutura suku Caraubalo no akompaña mós ofisial polísia suku (OPS) iha Caraubalo.
Jornalista : Vitorino Lopes da Costa
Editóra : Armandina Moniz
