Konstruksaun UKL ida iha Suku Caraubalo hetan impedementu
VIQUEQUE, 15 dezembru 2022 (TATOLI)— Prosesu konstruksaun Uma Kbi’it Laek (UKL) 2022 ida iha área Baria Laran, aldeia Mamulac, suku Caraubalo, Postu Administrativu Viqueque Vila, munisípiu Viqueque hetan impedementu.
Impedementu ne’e halo hosi abitante Manuel Pinto, tanba prosesu konstruksaun UKL ne’e halo kedan iha ninia aman nia rai.
“Ha’u impata kontruksaun UKL ida, ne’ebe konstrui iha ha’u-nia aman nia rai. Tanba ne’e maka ha’u impata. Se la’os halo iha ha’u-nia aman nia rai leten, ha’u la husu para. Nune’e ha’u hato’o ona karta ba Diretor Programa Nasionál Dezenvolvimentu Suku (PNDS) munisipiu Viqueque, atu halo kanselamentu ba UKL ida ne’e iha suku Caraubalo, Aldeia Mamulac”, Manuel Pinto, hateten ba jornalista sira, iha suku Caraubalo, kinta ne’e.
Berita terkait : Uma-kain 37 iha suku Caraubalo sai benifísiariu ba UKL + B
Ho nune’e, Manuel Pinto husu ba Diretor PNDS Munisipio Viqueque atu halo kanselamentu urgente ba UKL refere atu nune’e labele mosu problema iha povu nia le’et.
“Rai ne’ebé halo kontruksaun ba UKL ba ne’e la’os partense ba Miguel Soares (benifísiariu). Rai ne’e ha’u nia aman nian. Ne’e duni husu Diretor PNDS Munisipio Viqueque atu halo kanselamentu urgente ba UKL refere,” nia husu.
Nia mos husu ba Diretór PNDS, no ba Administradór munisípiu Viqueque, Xefe suku Caraubalo no Xefe aldeia Mamulac, atu harii fali uma ne’e iha fatin seluk.
Iha fatin seluk Xefe suku Caraubalo, João Pinto, haktuir Manuel Pinto no benifísiariu Miguel Soares ne’e família ba konstrusaun UKL. Manel Pinto hato’o karta reklamasaun mai suku Caraubalo kona-ba prosesu konstrusaun UKL iha Mamulac.
“Ita halo karta kanselamentu ruma tenke ho evidensia ne’ebé forte hanesan dokumentu rai nian. Ita labele korta tuir ita-nia hakarak. Se dokumentu rai nian laiha obra kontinua la’o”, nia informa.
Nia hatutan, família sira buka dalan hodi resolve. Se rezolve família labele maka kontinua lori prosesu iha Tribunál.
“Ami halo ona mediasaun entre parte rua, maibé parte ida halo reklamasaun lakoi partisipa no parte hari’i uma maka mai tur ho ami hodi halo mediasaun”, nia subliña.
Nia relata, molok halo uma UKL ba benifísiariu iha rekejitu suku forma ekipa ida no ekipa hosi suku hamutuk ho PNDS halo mak halo verifikasaun, no ekipa lidera hosi xefe suku.
“Karik rai ne’e benifísiariu nian tenke aprezenta dokumentu ruma ba ekipa verifikasaun. Se rai eransa ami husu deklarasaun. Enkuantu rai ida agora iha disputa nia laran ne’e rai eransa ba Manel Pinto no Miguel Soares nian,” tenik nia.
Entretantu konstrusaun UKL ba benifísiariu Miguel Soares ne’ebé agora sei iha disputa rai ne’e dadaun konstrusaun fíziku atinji ona 25%.
Jornalista : Vitorino Lopes da Costa
Editóra : Armandina Moniz
