MJ husu prezu kumpre regulamentu estabelese iha prizaun Suai
COVALIMA, 15 dezembru 2022 (TATOLI)–Ministériu Justisa (MJ) liuhosi reprezentante Diretór Jerál Administrasaun Polítika Ministériu Justisa (APJ), Delfio Soares Alves, husu ba prezu sira atu kumpre regulamentu ne’ebé estabelese iha prizaun Suai.
“Ami triste haree ita-boot sira-nia família liu-liu ita-boot sira-nia oan ne’ebé eskada, maibé sei kiik la uza roupa no na’in tolu-haat han hadau malu etu bikan ida. Ho loron ksolok natal ne’e, favór hanoin to’ok buat hirak-ne’e. Bbainhira livre hosi prizaun hakribit violénsia atu labele repete hahalok ne’ebé liu ona, nune’e tenke kumpre regulamentu iha prizaun ne’e,” Reprezentante Diretór Jerál Administrasaun polítika Ministériu Justisa (APJ), Delfio Soares Alves, hato’o liuhusi diskursu bainhira selebra natál hamutuk ho prezu sira, iha prizaun Covalima, kinta ne’e.
Governu liuhosi Ministériu Justisa (MJ), Ministériu Solidariedade Sosiál no Inkluzasaun (MSSI) no Políssia Nasional Timor-Leste (PNTL) garante atu hala’o nia dever, tanba Governu kontinua garante prezu sira-nia direitu bázika sira hanesan ba han no hemu bainhira hasoru fallansu ruma akontese labele tauk atu hato’o.
“Ami kontinua garante ita-boot sira-nia direitu bázika. Bainhira hasoru fallansu ruma akontese hato’o mai ha’u lalika tauk,” nia hateten.
Atu asegura programa restrisaun sosiál ne’e, Ministériu justisa la’ós la’o mesak sei iha rede apoiu sira iha prizaun tolu oinsá tau matan ba presidiáriu sira.
Reprezentante Diretór Jeral MSSI, Agapito Asis, reforsa Ministériu Solidariedade Sosiál no inkluzaun servisu hamutuk ho Ministériu jutisa liuhosi programa reintregra eis prezu sira, fasilita família sira vizita prezu iha prizaun no programa hala’o natál hamutuk.
“Ohin, hamutuk iha ne’e selebra natál hamutuk ho prezu sira iha prizaun Suai, tanba durante ne’e MSSI servisu hamutuk MJ hodi hala’o programa sira reintregra eis prezu ba nia família, fasilita família vizita prezu iha prizaun no programa natál hamutuk,” nia dehan.
Serimónia natál hamutuk ho prezu iha prizaun Suai ne’e, Ministériu Solidariedade Sosiál no Inkluzaun (MSSI) prevee orsamentu $2800.
Reprezentante Administradór Munisípiu Covalima, Vitorino do Carmo, hateten selebra natál hamutuk ho prezu sira iha prizaun Suai hanesan atu fó neon metin haksolok hamutuk ho prezu sira.
“Ohin, ita mai hamutuk iha ne’e atu selebra natál hamutuk ho prezu sira iha prizaun Suai hodi fó neon metin no haksolok hamutuk ho sira,” nia hateten.
Autoridade mós fó hanoin katak ho natál tinan foun mai atu haree futuru ne’ebé di’ak, nune’e prezu sira tenke matein ho pozisaun di’ak hodi hateke ba oin.
Durante selebra natál hamutuk ho prezu sira iha Suai ne’e, Governu mós entrega prezente natál ba prezu sira hosi bloku A to’o C.
Tuir dadus. prezu iha prizaun Suai hamutuk na’in-116 ne’ebé mai hosi munisípiu sira hanesan Suai, Manufahi, Bobonaro no Ainaro.
Jornalista : Celestina Teles
Editór : Cancio Ximenes
