Top

Programa nutrisaun iha “Kantina Matak” Palásiu Prezidensiál tulun labarik-inan sira

Prezidente Repúblika, José Ramos Horta, halo abertura ba programa nutrisaun iha “Kantina Matak” iha Palásiu Prezidensiál Nicolau Lobato, Bairru-Pite, kinta (15/12/2022). Imajen Tatoli/Egas Cristovão.

DILI, 15 dezembru 2023 (TATOLI)- Prezidente Repúblika (PR), José Ramos Horta, kinta ne’e hala’o abertura ba programa nutrisaun iha “Kantina Matak” iha Palásiu Prezidensiál atu tulun ema ki’ak liu-liu labarik no inan sira loro-loron.

Prezidente Repúblika, José Ramos Horta, halo abertura ba programa nutrisaun iha “Kantina Matak” iha Palásiu Prezidensiál Nicolau Lobato, Bairru-Pite, kinta (15/12/2022). Imajen Tatoli/Egas Cristovão.

“Programa ne’e halo parte buka tulun uitoan eme sira-ne’ebé ki’ak liu-liu labarik no inan sira loro-loron hodi fó han ba ema iha dadeer na’in-150 no lorokraik ema 150 ho totál ema 300 loron lima hahán di’ak ho etu, modo, naan manu, ikan, manu tolun,” PR Horta hateten ba jornalista sira hafoin abertura ba programa nutrisaun iha Kantina Matak iha Palásiu Prezidensiál Nicolau Lobato, Bairru Pite.

Tuir Xefe Estadu, la signifika Prezidénsia Repúblika atu rezolve problema sub-nutrisaun maibé pelumenus ajuda labarik na’in-300 kada loron.

“La’ós ne’e de’it. Ha’u espera embaixada ruma, Nasaun Unida, setór privadu nasionál no internasionál sira haree hetan inspirasaun entaun ita mós bele halo. Entaun, sira bele loke ida iha Becora, Tasi-Tolu, ba iha Aileu, iha ne’ebé-ne’ebé liu-liu iha aldeia no área rurál sub-nutrisaun piór liután,” nia dehan.

Tanba ida ne’e hanesan efeitu multiplikadór ema seluk bele halo ho sira-nia rekursu rasi, purtantu buat ida simples hodi loro-loron labarik sira bele mai han pelumenus loron lima nia laran.

Horta dehan, ho orsamentu Prezidénsia Repúblika nian laiha orsamentu hosi fatin seluk depois sei kontaktu setór privadu ruma se sira hakarak oferese foos, naan manu ruma no seluk tan.

Iha parte seluk, Xefe Estadu fó sai katak Prezidénsia Repúblika iha programa seluk hanesan empoderamentu ekonómia ba feto sira, nune’e haree oinsá feto sira-ne’ebé faan modo no hahán bele ajuda sira hodi hadi’a liután sira-nia negósiu no apreende mós jestaun konta.

Aleinde ne’e, Xefe Estadu sei buka meiu hodi oinsá apoiu negosiante ambulante sira, hodi oferese ba sira ambulante (tiga roda) eletriku foun ne’e, nune’e sira bele lao ba-mai hodi faan sira-nia sasán.

Aleinde ne’e, sei apoiu mós halo kioske ho dezeñu ida di’ak hodi entrega ba inan-feton sira, nune’e sira lalika tau sasán iha rai nune’e sei ko’alia ho autoridade munisípiu hodi haree iha fatin ne’ebé mak iha rezerva tau uma oan hodi sira bele faan sasán.

Jornalista : Nelson de Sousa

Editór       : Cancio Ximenes

Publisidade

Leave a Reply

Latest Post

error: Content is protected !!