Ezekusaun reál OJE 2022 atinje ona biliaun $1,5
DILI, 16 dezembru 2022 (TATOLI)—Governu sentrál nia taxa ezekusaun reál ba Orsamentu Jerál Estadu (OJE) tinan fiskál 2022 to’o loron 15 dezembru 2022 atinje ona biliaun $1,5, ne’ebé montante ne’e ultrapasa hosi tinan 2021 ho montante biliaun $1,4.
“Taxa ezekusaun tinan ne’e mak hanesan segundu maiór desde tinan 2016, ne’ebé Governu konsege ezekuta biliaun $1,6. Enkuantu tinan kotuk, maski Timor-Leste aplika restrisaun oin-oin hanesan Estadu Emerjénsia, Serka Sanitária no Konfinamentu Obrigatóriu ne’ebé limita sirkulasaun ema no sasán sira maibé Governu Sentrál nia taxa ezekusaun to’o loron 31 dezembru 2021 atinje biliaun $1,4 ka 73% hosi totál OJE retifikativu biliaun $2,1,” refere nota ne’ebé Agência Tatoli asesu, sesta ne’e.
Notísia relevante: PN aprova proposta OJE 2022 billaun $2 iha finál globál
Taxa ezekusaun segundu maiór iha tinan kotuk ne’e rezulta kresimentu ekonómiku +2,9% hosi -8,3% iha tinan 2020.
Iha Lei Grande Opsaun Planu 2023 ne’ebé Prezidente Repúblika, José Ramos Horta promulga iha fulan-juñu liubá, Ministériu Finansa aprezenta senáriu makroekonómiku ne’ebé prevee katak Produtu Internu Brutu (PIB) la’ós-petrolíferu tinan 2022 sei krexe ba 2,9% no 3,1% iha 2023 ho inflasaun 6,7% iha tinan 2022.
Tuir projesaun hosi Ministériu Finansa, to’o tinan ne’e nia rohan, ekonomia Timor-Leste bele krexe to’o 3%, ne’ebé ho ritmu kreximentu ida hanesan ne’e maka ekonomia Timor-Leste sei bele rekupera totál iha tinan 2024 no Timor-Leste bele tama filafali ba trajetória dezenvolvimentu.
Jornalista : Arminda Fonseca
Editora : Julia Chatarina
