Governu laiha koñesimentu Timor Holding reabilita “Gedung Wanita” iha Suai

COVALIMA, 16 dezembru 2022 (TATOLI)–Governu laiha koñesimentu kona-ba uma no rai Estadu ne’ebé hanaran Gedung Wanita ne’ebé empreza Timor Holding halo reabilitasaun tanba seidauk halo kontratu arendamentu.
Notísia Relevante: Kompañia Timor Holding sei reabilita Edifisiu Gedung Wanita iha Covalima
“Ministériu Justisa (MJ) seidauk halo kontratu arendamentu partikular ruma no formal, seidauk iha koñesimentu hosi Ministériu Justisa (MJ no Dirasaun Nasionál Terras no Propriédade, tanba seidauk iha kontratu arendamentu tuir dekretu-lei19/2004 kona-ba arendamentu nian,” Ministru Justisa Tiago Amaral Sarmento hateten ba Agência Tatoli iha prizasaun Suai, sesta ne’e.
Uma no rai Estadu ne’ebé durante ne’e konsidera ho naran Gedung Wanita ida-ne’e seidauk iha kontratu arendamentu, tuir lolos Ministériu Justisa liuhusi Terras no Propriedade mak halo kontratu arendamentu, maibé seidauk iha arendamentu no akordu ho partkculár ruma.
Durante ne’e, Ministériu Justisa seidauk foti desizaun ruma kona-ba “Gedung Wanita” no seidauk iha desizaun ruma, nune’e MJ laiha koñesementu tanba seidauk selebra kontratu arendamentu.
Antes ne’e, iha loron 05 outubru, administradór munisípiu Covalima Francisco de andrade hateten, Kompañia Timor Holding halo reabilitasaun ba salaun Gedung Wanita bazea ba pedidu autorizasaun hosi Ministériu Justisa.
Hafoin autotidade cCvalima hasai deklasaun, kompañia Timor Holding reabilita no hodi transforma Gedung Wanita sai fatin loke jogu Kasino maibé joven no veteranu sira la aseita atu trannforma Gedung Wanita sai fatin jogu Kasino
Razaun la aseita Gedung Wanita sai fatin jogu Kasino tanba fó impaktu psikolojia ba funsionáriu sira-ne’ebé servisu iha edukasaun munisípiu Covalima, estudante iha eskola sira iha pre-eskolár, Komando Polisia Nasional Timor-Leste (PNTL) no rezidénsia Administradór Munisípiu rasik.
Tuir observasaun Agência Tatoli katak, prosesu kompañia Timor Holding halo reabilitasaun ba Gedung Wanita dadaun ne’e to’o ona iha faze taka zinku ba nia kakuluk.
Notísia Relevante: Kompañia Timor Holding sei reabilita Edifisiu Gedung Wanita iha Covalima
Jornalista : Celestina Teles
Editór : Cancio Ximenes

