EDUKASAUN, HEADLINE

LABEH gradua estudante 14 hosi Edukasaun Pré-Eskolár

LABEH gradua estudante 14 hosi Edukasaun Pré-Eskolár

Estudante sira prepara atu tama ba salaun atu simu graduasaun, iha salaun TVE, Comoro, sesta (16/12). Imajen Tatoli/Tomé Amado

DILI, 16 dezembru 2022 (TATOLI)—Lalenok ba Ema Hotu (LABEH) realiza serimónia graduasaun ba dahitu ba estudante 14 hosi Edukasaun Pré-Eskolár.

“Ita-nia labarik na’in-14 ne’e liu ona prosesu tomak ne’ebé LABEH prepara ba sira liuhosi extra kurrikulár ne’ebé sira halo no ohin sira hatudu ona buat ne’ebé sira apreende iha tinan-ida nia laran, tanba ne’e maka ohin sira bele simu ona graduasaun. Ho graduasaun ne’e, estudante hamutuk na’in-60 simu ona graduasaun,” Diretór Ezekutivu LABEH, Christopher Henry Samson, hateten, iha salaun TVE, Comoro, sesta ne’e.

Biban ne’e, Responsável ne’e husu ba estudante graduadu ne’ebé husik ona Edukasaun Pré-Eskolár atu kontinua estuda ho di’ak no husu ba inan aman sira atubele akompaña nafatin prosesu ensinu aprendizajen tanba labarik sira ne’e hatudu ona kapasidade nu’udar estudante ne’ebé iha kualidade.

“Ha’u haree sira na’in-14 ne’e iha ona koñesimentu báziku maibé presiza tan ema hotu inklui inan aman sira-nia akompañamentu liután iha prosesu ensinu aprendizajen ne’e atu buat ne’ebé sira hetan ona iha LABEH labele lakon nune’e de’it,” nia akresenta.

Notísia relevante: LABEH: TL okupa ranking 44 índise demokrasia mundiál 2020

Tuir Christopher Henry, edukasaun mak sai hanesan oportunidade di’ak ida ba ema hotu tanba bainhira labarik ida laiha koñesimentu di’ak kona-ba edukasaun maka sei sai hanesan manu ida laiha liras, tanba ne’e edukasaun hanesan pasaporte ida.

“LABEH nu’udar Organizasaun Naun Governamentál ne’ebé durante ne’e loke oportunidade ba labarik timor-oan sira atu hetan edukasaun adekuadu iha nível Pré-Eskolár no Ensinu Báziku, maibé kuandu ba futuru maka LABEH iha liután oportunidade, vontade no rekursu adekuadu maka bele kontinua ba nível a’as liu,” nia tenik.

Daudaun totál estudante ativu ne’ebé sei kontinua hela estudu iha LABEH hamutuk 56.

Iha biban hanesan, Reprezentante inan aman, Manuel Pereira Cardoso, agradese ba Diretór Ezekutivu LABEH, ne’ebé fó ona dedikasaun no responsabilidade boot hodi ohin bele hatudu rezultadu ho susesu.

“Hosi kualidade edukasaun ne’ebé LABEH fó ona ba ami-nia oan sira maka ohin ami bele haree duni susesu, ida-ne’e maka sai orgullu boot ida ba ami inan aman sira,” nia dehan.

Aleinde ne’e, nia husu nafatin ba organizasaun ne’e atu kontinua tau importánsia ba edukasaun labarik sira, atu nune’e Timor nia oan sira bele sai labarik ne’ebé iha kualidade hodi prepara futuru di’ak liu atu sai ema ne’ebé iha responsabilidade ba rai no povu.

Jornalista   : Tomé Amado

Editora        : Julia Chatarina

iklan
iklan

Leave a Reply

iklan
error: Content is protected !!