DILI, 16 dezembru 2022 (TATOLI)—Prezidente Repúblika (PR), José Ramos Horta, sesta ne’e, simu audénsia ho Diretór Empreza Aero Dili, Lourenço de Oliveira, iha Palásiu Prezidensiál Nicolau Lobato, Bairru Pite, Dili.
Notísia Relevante: Aero Dili alarga vou nível internasionál iha janeiru 2023
Diretór Empreza Aero Dili, Lourenço de Oliveira, informa ba Prezidente Repúblika kona-ba preparasaun aviaun aero Dili nian ne’ebé mak prevista iha janeiru 2023 tama mai ne’e, no PR apresia tanba atu halo operasaun ba internasionál ne’ebé semo ho Bandeira RDTL.
“Primeiru liu hosi Prezidente Repúblika atu tuir inaugurasaun tanba uluk ha’u komesa nia mak ba halo no agora komesa rasik ita-nian mak ba halo. Durante sorumutu Prezidente Repúblika apresia tebes inisiativa ida ne’ebé mak halo ba ita nia rain ita mós bele semo ho bandeira RDTL no aviaun rasik ba ema seluk nia nasaun,” Diretór Empreza Aero Dili ne’e hateten ba jornalista sira hafoin hala’o enkontru ho Xefe Estadu.
Resposta Xefe Estadu disponível no prontu atu ba halo inaugurasaun iha fulan janeiru 2023 no rute aviaun ne’e sei semo tuir Timor-Leste ba nasaun sira-ne’ebé mak iha ona ASA (Air Services Agreement-Akordu Serbisu Aero).
“Semo hosi ne’e ba Singapura, Austrália no Indonézia, ba fatin sira-ne’ebé sira mós semo mai tuir agreement ne’ebé ita iha ho nasaun sira seluk, sira mós bele semo no ita mós bele semo ba,” nia hateten.
Jornalista : Nelson de Sousa
Editór : Cancio Ximenes
