PR Horta kondekora Embaixadór Xina ho medalla méritu

DILI, 16 dezembru 2022 (TATOLI)—Prezidente Repúblika (PR), José Ramos Horta, kondekora Embaxadór Xina iha Timor-Leste, Xiao Jianguo.
Medalla méritu ne’e kria hosi dekretu-lei númeru 15/2009, 18 marsu, hodi rekoñese no agradese militár, polísia no sivíl, nasionál no internasionál ne’ebé serve nasaun Timor-Leste ho esforsu orden sosiál no asaun kontribui ho signifikativu ba pás no estabilidade nasionál.
Medalla méritu ne’e simboliza mós ho gratidaun ba nasionál no iha mundu dezenpeña papél ativu no krusiál dezenvolvimentu demokrásia iha Timor-Leste.
Serbisu presta iha ámbitu relasaun entre Estadu ho sentidu promove amizade entre povu, kontribui mós ba pás no estabilidade nasionál no dezenvolvimentu iha Timor-Leste.
“Esforsu Embaixadór Xina rezidente iha Timor-Leste, Xiao Jianguo, manisfesta tempu naruk nia misaun iha ita-nia nasaun, merese rekoñese no valoriza hosi Estadu,” dekretu Prezidente Repúblika ne’e haktuir.
Asaun oioin kontribui hosi diplomata Xina ne’e mós ba promosaun amizade entre povu. Reafirmasaun pás no fortifikasaun estabilidade nasionál iha Timor-Leste.
Timoroan barak benefísia esforsu Embaixadór Xina durante hala’o misaun iha Timor-Leste.
Embaixadór Xina, Xiao Jianguo, hateten ohin nia-parte hato’o despedida ba Xefe Estadu tanba hala’o misaun iha nasaun ne’e liu tinan haat ona.
Durante hala’o nia misaun ne’e dezenvolve relasaun di’ak ho timoroan sira tanba iha tinan haat hasoru mudansa no dezáfiu barak hanesan COVID-19, inundasaun iha nasaun ne’e no Embaixada Xina sempre prontu fó apoiua.
Hanesan COVID-19, Xina nu’udar nasaun dahuluk haruka ekipamentu médiku mai Timor-Leste, oferese vasina ho kuantidade boot.
“Ha’u husik Timor-Leste hakarak hato’o desejuu no espera Timor-Leste sei dezenvolve liután, forte no prosperu. Espera relasaun bilaterál Xina no Timor-Leste sei metin ba nafatin,” nia hateten.
Nia dehan, durante sorumutu ho Xefe Estadu hato’o ba nia parte katak Xina ezerse papél importante iha kooperasaun entre nasaun sira.
“Ko’alia kona-ba relasaun bilaterál entre nasaun rua ami halo buat barak ba Timor-Leste no espera relasaun bilaterál sei hakat ba oin no sei haburas lasu amizade,” nia dehan.
Relasaun bilaterál Timor-Leste ho Xina tinan ida-ne’e Ministéiru Negósiu Estranjeiru no Kooperasaun (MNEK) Xina mai vizita Timor-Leste iha akordu sira-ne’ebé asina sei iha prosesu implementasaun nia laran.
“Espera katak ha’u nia susesór sei halo buat barak ba Timor-Leste atu implementa akordu hirak ne’ebé MNEK Xina nia vizita mai Timor Leste,” nia hateten.
Xina sei kontinua apoiu iha área edukasaun hodi oferese bolsa estudu ba área saúde tanba durante ne’e fornese ona asisténsia médiku tinan ualu-resin.
Ba dezenvolvimentu ekonómia, Xina halo buat barak iha nasaun ne’e hanesan desenvolvimentu Portu Tibar, harii ona armajen boot rua hodi apoiu rai foos no seluk tan, no mós sei ajuda iha network televizaun no kampu futeból.
Jornalista : Nelson de Sousa
Editór : Cancio Ximenes

