iklan

HEADLINE, MUNISÍPIU, VIQUEQUE

Sentru Internamentu Viqueque rejista labarik má-nutrisaun 47

Sentru Internamentu Viqueque rejista labarik má-nutrisaun 47

Sentru Internamentu Viqueque. Imajen Tatoli/Vitorino Lopes da Costa

VIQUEQUE, 16 dezembru 2022 (TATOLI)—Sentru Internamentu Viqueque rejista labarik ho kondisaun má-nutrisaun hamutuk 47 iha tinan ne’e nia laran.

“Ami halo tratamentu ba labarik má-nutrisaun hamutuk na’in-47 hahú janeiru to’o dezembru tinan ne’e. Ami observa iha labarik na’in-haat ho kondisaun grave nune’e ami transfere ba Ospitál Referál Baucau,” Xefe Sentru Viqueque, Celestina Soares, hateten ba jornalista sira iha Sentru Saúde, Viqueque Vila, sesta ne’e.

Hosi labarik sira ho kondisaun má-nutrisaun, labarik 31 rekuperadu no fila ba uma, enkuantu rua maka daudaun ne’e sei kontinua halo tramentu iha Sentru Internamentu Viqueque.

Tuir responsável sentru, atu redús kondisaun ne’e filafali ba preparasaun ai-han ba labarik sira, la’ós pesoál saúde maka prepara maibé uma-kain ida-idak maka tenke hadi’a nutrisaun uma-laran hodi minimiza moras ne’e.

Notísia relevante: ADB investe millaun $3 rekupera má-nutrisaun iha munisipíu lima

Aleinde ne’e, ekipa saúde realiza programa Servisu Integradu Saúde Komunitária (SISCA) ba komunidade lokál ho di’ak hodi prevene má-nutrisaun.

“Ami realiza atividade SISCA iha suku no halo demonstrasaun iha fasilidade saúde sira hodi komunidade ne’ebé ho oan kiik sira bele hatene prepara ai-han nutrisaun ba oan sira,” nia akresenta.

Nune’e mós, Celestina Soares fó hanoin atu han ai-han ho nutrisaun di’ak hanesan ai-han lokál sira.

“Dalabarak ita iha forumungu, foos lokál, manu-tolun lokál, ou produtu lokál seluk, maibé ita ba fa’an tiha no sosa fali supermi maka fó fali ba oan sira. Ida-ne’e maka ita-nia hahalok ne’ebé ladún di’ak, maibé ami sujere nafatin ba família sira hodi uza modo tahan sira-ne’e no fó ba labarik sira,” nia tenik.

Jornalista   : Vitorino Lopes da Costa

Editora        : Julia Chatarina

iklan
iklan

Leave a Reply

iklan
error: Content is protected !!