iklan

NASIONÁL, DILI, POLÍTIKA

Star King sei konstrui “Jardim da Chama Eterna’ iha 2023

Star King sei konstrui “Jardim da Chama Eterna’ iha 2023

Prezidente AMRT, I.P, Hamar Antoninho Alves. Imajen Tatoli/Francisco Sony

DILI, 16 dezembru 2022 (TATOLI)—Governu Timor-Leste liuhosi Arkivu no Muzeu RezisténsiaTimorense (AMRT), sesta ne’e, ofisialmente asina kontratu ho empreza Star King no sei konstrui “Jardim da Chama Eterna” iha 2023,

Notísia Relevante: Autoridade hahú prepara aprovizionamentu kontratu konstrusaun ‘Jardim da Chama Eterna’

“Ofisialmente iha ona asinatura akordu instituisionál entre Estadu ho emprezáriu, Empreza mak Star King. Prosesu ne’e tomak ninia aprovizionamentu mai ba iha Komisaun Nasionál Aprovizionamentu (CAN, siglá portugés), CNA pasa ba Konsellu Administrasaun Fundu Infraestrutura (KAFI) aprova no ita-nia Primeiru-Ministru asina ona, agora hein de’it konstrutór asina. Konstrutór asina ne’e hanesan aktu ofisiál ida-ne’ebé Estadu Timor-Leste ho konstrutór (Star King) konkorda no bele hahú projetu ‘Jardim da Chama Eterna’ iha tinan oin,” Diretór Ezekutivu no Prezidente Arkivu no Muzeu RezisténsiaTimorense (AMRT), Hamar Antóninho Baptista Alves, hateten ba jornalista sira iha aredór muzeu rezisténsia, sesta ne’e.

Ramata asina kontratu ne’e, sei hahú kedan halo serbisu refere no sira termina ona iha fulan 18 atu finaliza kontrusaun ba “jardim da chama eterna” ne’e.

“Alvu ba konstrusaun ne’e rasik ita iha tempu ne’ebé termina ba fulan 18. Purtantu ita kálkulu katak iha meadu 2024 ne’e konstrusaun finaliza ona. Ita mós agora hala’o hela mós estudu sira ba istória antigu liu, ita komesa tuku odamatan muzeu hotu-hotu iha Portugál. Ita hakarak tuku odamatan muzeu Japaun, Austrália tanba ligadu liu-ba segunda guerra mundiál,” Hamar hatutan.

Notísia Relevante: AMRT Aprezenta Ona Modelu “Jardim da Chama Eterna” Ba Altu Entidade

Tuir-nia, liga ho estatutu AMRT nian kria espasu reflesaun no mós espasu montazen espozisaun permanente dedika ba funu tradisionál sira.

“Atu hateten kumpre estatutu AMRT nian, ita kria tan espasu ida hanesan espasu reflesaun memória no mós espasu ida-ne’ebé mós ita hakarak atu halo montazen espozisaun permanente ida-ne’ebé mak dedika ba guerra tradisionál kontra kolónia salazar, segunda guerra mundiál nomós memória kona-ba luta rezisténsia tinan 24 ne’ebé lakontempla iha espozisaun ida permanente agora,” nia esplika.

Espasu ida-ne’e ho objetivu importante hodi hametin memória no istória sira nasaun ne’e nian ba jerasaun tuir mai.

“Espasu ida-ne’e rasik hanesan espasu ida-ne’ebé mak importante liu ba mantein ita-nia memória ida-ne’ebé moris ba jerasaun no ba jerasaun tuir-mai. Ninia importante liu mak sentidu Estadu, nune’e ita-nia espasu ida-ne’e valoriza, fó onra no respeitu ba ita-nia eroi ne’ebé mate ba funu ida-ne’e. Tantu, sira-ne’ebé ita hakoi ka ba sira-ne’ebé ita labele hakoi no ida-ne’e sentidu reflesaun ba ema hotu-hotu ne’ebé mate laharee. Ba ida-ne’ebé mak tuur iha estrutura ba ema hotu-hotu ne’ebé mate ba rai ida-ne’e, ida-ne’e hanesan fatin reflesaun ba fó omenajen, fatin ida ne’ebé ba família hotu-hotu bele fó sira-nia omenazen. Chama ne’e hanesan reflesaun katak mate moris fali no moris ba nafatin.,” nia esplika.

Diretór empreza konstrutór Star King, Lay Siu Hing, hateten sira-nia parte agradese ba Governu no sira kompromete hala’o serbisu konstrusaun ne’e to’o ramata.

“Ami hosi kompañia agradese tanba Estadu bele fó fiar mai ami ba konstrusaun muzeu rezisténsia nian. Ita prontu koopera halo to’o remata. Kona-ba ekipamentu ita laiha problema, ita prontu,” King Lay Siu Hing hateten.

Obra ida-ne’e kaer hosi empreza star King Construction no DMF Acesso iha Joint Venture ho supervizaun hosi konsórsiu Soares no Guterres iha Joint Venture ho 3CLX enjeñaria ne’ebé sei hahú iha tinan oin ho durasaun fulan 18.

Lokalizasaun ne’e iha muzeun nia oin no “Jardim da Chama Eterna” reprezenta investimentu públiku ho totál millaun $5.059.000,00, iha ne’ebé $4.548.000,00 ba konstrusaun obra, $351.500,00 ba supervizaun obra no besik $160.000,00 aloka ba realizasaun estudu tékniku.

Notísia Relevante: AMRT Aprezenta Ona Modelu “Jardim da Chama Eterna” Ba Altu Entidade

Jornalista : Osoria Marques

Editór        : Cancio Ximenes

iklan
iklan

Leave a Reply

iklan
error: Content is protected !!