Corner Store Network lansa sentru produsaun iha Metinaru
DILI, 17 dezembru 2022 (TATOLI) – Empresa The Corner Store Network halo lansamentu ba sentru produsaun no loja ba produtu lokál iha Postu Administrativu Metinaru, Munisípiu Dili.
Inisiativa negósiu ida ne’e, hahú iha 2018, loja ba produtu lokál sira ne’e hanesan mina nuu, xha, ainanas, tomate aimanas, pimenta marungi kinur no produtu sira seluk tan.
Na’in ba Corner Store Network Timor Leste, Martinho Gorrety, hateten problema sosiál ekonomia mak komunidade sei hasoru hanesan estragu aihan iha tempu kolleita, má nutrisaun, rendimentu familiár kiik, dezempregu no produtu lokál ne’ebé kuaze ladún tau valór hirak ne’e sei sai hanesan preokupasaun nasaunn nian.
”Nu’udar timoroan, ami hakarak fó kontribuisaun liuhosi meiu ne’ebé ami iha hanesan prezervasaun no transformasaun produtu lokál ba produtu variedade ne’ebé atrativu iha merkadu nasionál sai hanesan meiu ne’ebé ami utiliza. Entaun liuhosi dalan ne’e mós ita kontribui ona ba rendimentu ba grupu toos na’in sira liuhosi sosa sira nia produtu”, Martinho Gorrety, hateten iha nia diskursu bainhira konklui lansamentu iha Postu Administrativu Metinaro.
Ho situasaun no dezafiu sira ne’ebé hasoru no ezijénsia negósiu nian iha inísiu 2019 hetan parseiru ida ho naran “The Corner Store Network Australia liuhosi kordenasaun no komunikasaun ikus sira ho laran kmaan hakarak ajuda fundu, fasilidade ne’ebé ajuda ekipa hodi halo prosesamentu ba produtu lokál.
“Sira mós ajuda hodi fasilita ami nia ema ida ba tuir formasaun iha Austrália ne’ebé foka liubá prezervasaun, food hygiene no seluk tan. Depois hirak ne’e la´o sira nafatin fó profesionál suporta no akompana ami” afirma.
Iha 2020 bainhira Embaixada Nova Zealandia iha Timor Leste loke ba públiku, programa ida ho naran “Aihan Di´ak ba Moris Di´ak”, Nune’e deside aplika ba programa ida ne’e, agradese tebes tanba bele aseita proposta no budged hodi ajuda iha parte fasilidade. Ida ne’e ajuda liután no motiva liután atu hala´o atividade liga ba grupu toos na’in sira nia produtu no rendimentu.
Iha tinan 2021, Governu liu husi MTCI servisu hamutuk ho UNDP/PNUD realiza primeiru kompetisaun negósiu ideia inovativu, deside hodi tuir kompetisaun refere.
“Agradese tanba ami sai manan na’in iha kompetisaun ida ne’e, entaun sai orgullu ida mai ami, maibé orgullu liután bainhira ami hetan oportunidade ba formasaun no envolve iha rede sira ne’ebé estabelese. ohin loron ami iha ona grupu toos na’in kuase 50 resin, kliente ka supermerkadu hamutuk 18 no joven no feto maluk sira hamutuk na’in 10 mak servisu hamutuk ho ami”, revela.
Fatin ida ne’e mós la´os de´it utiliza ba prosesamentu no transformasaun produtu sira, maibé sei sai sentru treinamentu ne’ebé foka liubá transforma produtu ka valorizasaun produtu lokál. Feto maluk sira husi munisípiu sei iha oportunidade atu apriende hamutuk iha fatin ida ne’e.
Atu garantia sustentabilidade negosiu nian, fatin ida ne’e mós sei iha restaurante kiik ida ho menu produtu lokál, coffee shop, no aifuan fresku sira seluk.
Produtu hirak ne’e ami distribui ona ba supermerkadu sira iha Dili laran hanesan Lita Store, Dilimart, Jacinto, w4, Lider mart, 8 supermarket, loja agrikultura, amigo toos nain, meimart, lider hypermart, Fresh mart, centro no sierra.
Iha fatin hanesan representante the corner store networkAustralia Alice Mahar, dehan investimentu ida ne’e atu responde ba iha nesssisdade populasaun nian ba iha mudansa klimátika.
“Apoiu ida ne’e orsamentu maihosi Embaixada Australia iha Timor Leste hodi prezerva ba produtu lokál’, esplika.
Aleinde ne’e emprezáriu simu orsamentu besik hamutuk rihun $ 13 liuhusi kompetisaun ideia inovativu ne’ebé organiza husi Fundu Nasoes Unidas ba Desenvolvimentu (UNDP) no Ministériu Turismu Komersiu´Indústria (MTCI). Orsamentu ida ne’e disponibiliza husi Ajénsia Internasionál Kooperasaun Korea.
Nune’e, Embaixada Nova Zelandia disponibiliza rihun $49 liuhosi material sira produsaun nian.no rihun $100 husi The Corner Store Network Australia.
Jornalista : Felicidade Ximenes
Editór : Zezito Silva
