MS-MAPKOMS asina akordu haforsa traballu promosaun no edukasaun saúde
DILI, 19 dezembru 2022 (TATOLI)— Ministra Saúde, Odete Maria Freitas Belo ho Ministru Asuntu Parlamentár no Komunikasaun Sosiál, Francisco Martins Jerónimo, segunda ne’e, hala’o asinatura akordu serbísu hamutuk iha área diseminasaun infomasaun kona-ba setor saude.
Biban ne’e, Ministra Odete dehan komunikasaun sosiál sai nu’udar ferramentu importante ba setór saúde, tanba permite halo diseminasaun informasaun ba públiku kona-ba polítika, estratéjia no matadalan balun ne’ebé Governu dezenvolve iha área saúde.
“Liuhosi Komunikasaun Sosial, profisionál saúde sira bele kontribui di’ak liutan atu organiza kampaña promosaun edukasaun no saúde,” hateten Governante ne’e, hafoin asina akordu refere iha Palásiu Sinzas,Caicoli.
Populasaun bele simu informasaun importante, liu husi papél mídia, Ministériu Saúde iha oportunide boot atu promove ábitu ka komportamentu ne’ebé saudável hodi bele prevee nomós aprende oinsá atu kontrola moras ka epidemia ruma.
Nia afirma mundu tomak inklui iha Timor-Leste, miss-information ka mal-informasaun sai problema boot ne’ebé bele afeta negativamente impaktu ne’ebé Komunikasaun Sosiál bele iha.
Tanba ne’e, Ministériu Saúde iha interesse atu haforsa relasaun ho meiu komunikasaun sosiál iha rai-laran, liuliu ba mídia sira ne’ebé Governu bele kontrola, hodi bele transmitie mensajem edukasaun no promosaun saúde ba populasaun tomak ne’ebé iha asesu ba midia iha Aldeia, suku, postu administrativu, munisípiu, rejiaun to’o nível Nasionál.
Ministra hatutan presiza hala’o atividade importante inklui Talk Show, entrevista, video-mensájen, kampañia imunizasaun ka kampaña edukasaun no promosaun saúde sira hotu, no seluk tan.
Kobertura ba eventu Ofisiál sira, akompaña atividade balun iha nível Nasional, nomós iha nível komunitáriu hanesan Saúde na Família iha Munisipiu, Emerjénsia Ospitalar no Atividade husi Instituisaun Autónoma Saúde hanesan HNGV, SAMES, Laboratóriu Nasional Saúde, Formasaun Profisional Saúde ne’ebé organiza husi Institutu Nasionál Saúde Públika.
“Hare’e ba futuru, ha’u sente katak servisu ne’ebé Ministériu Saúde halo merese atensaun no difusaun iha média sosiál ba populasaun Timorense, espesialmente entre joven sira, hodi fó vizibilidade di’ak liután kona-ba Planeamentu Familiár, kontrolu moras hada’et hanesan HIV-SIDA no TB, kontrolu moras la hada’et, inklui risku tabaku, álkol no ma nutrisaun ba moras ho krónika no moras mental”.
Nune’e, nia fiar katak futuru liuhosi MoU ne’ebé asina entre Ministériu Saúde ho MAPKOMS, tékniku sira bele fahe informasaun no prepara planu asaun ida ne’ebé bele kontribui ba prosesu deZenvolvimentu servisu nasionál saúde hodi hadi’a Ema nia Moris no atingi visaun Timoroan Saudável iha Timor-Leste Saudável.
Iha fatin hanesan, MAPKOMS, Francisco Jeronimo, informa iha obrigasaun atu ajuda habelar tan informasaun ba komunidade hotu-hotu kona-ba haforsa saúde.
“Atu komunidade sira iha área rurál asesu informasaun kona-ba setór saúde nian, mak presiza duni apoia atu komunidade hotu hetan informasaun sira liuhusi kanál media hotu”, afirma.
Komunidade sira mós dalabarak seidauk hatene loloos moras sira mosu hanesan uluk tinan kotuk kona-ba COVID-19, ne’ebé la’o iha rai laran, nune’e Governu iha obrigasaun atu esplika didiak ba sira kona-ba moras sira ne’e.
Jornalista : Felicidade Ximenes
Editór : Florencio Miranda Ximenes
