PN autoriza viajen PR Horta ba Brazíl no Suísa
DILI, 19 dezembru 2022 (TATOLI)—Parlamentu Nasionál (PN), segunda ne’e, autoriza viajen Prezidente Repúblika (PR), José Ramos Horta, ba Brazíl no Suísa.
Ajenda Prezidente Repúblika ba iha Brazíl hosi loron 28 fulan dezembru to’o 05 janeiru 2023 hodi partisipa serimónia tomada pose Prezidente Repúblika foun Brazíl, Luís Lula da Silva.
Ajenda Prezidente Repúblika nia viajen la ofisiál ba Suísa hodi partisipa iha forum ekonómiku hosi loron 13-21 fulan janeiru 2023.
“Rezolusaun PN númeru 111/2022 rezultadu votasaun a-favór 47, kontra no abstensaun 0, nune’e pasa. Rezolusaun PN númeru 112/2022 ho votu a-favór 46, kontra 0 no abstensaun ida pasa,” Prezidente PN, Aniceto Longuinhos Guterres Lopes, hateten liuhosi reuniaun plenária PN.
Entertantu, antes ne’e PN fó ona asentimentu vizita Xefe Estadu ba Indonézia, Austrália, Estadu Unido Amérika (EUA), Portugál, Suísa, Kambodia no Singapura.
Prezidente Republika informa mós viajen traballu ba Malázia relasiona ho konvite pesoál hosi Primeiru Ministru foun Malázia.
Notísia Relevante: PR Horta atende konvite PM Anwar Ibrahim vizita Malázia
Jornalista : Nelson de Sousa
Editór : Cancio Ximenes
