Top

PN hasai imunidade deputadu António da Conceição sai testamuña iha Tribunál

Membru PN hosi Bankada PD, António da Conceição ‘Kalohan'. Imajen TATOLI/António Gonçalves

DILI, 19 dezembru 2022 (TATOLI)—Parlamentu Nasionál (PN), segunda ne’e, liuhosi reuniaun plenária ho votasaun sekretru hasai ona imunidade Deputadu hosi bankada Partidu Demokrátiku (PD), António da Conceição ‘Kalohan’, hodi ba tuir prosesu julgamentu iha Tribunál primeira instánsia hanesan testamuña.

Notísia Relevante: PN hasai ona imunidade ba deputadu António da Conceição ‘Kalohan’

Aautorizasaun ne’e, fó dalan ba Deputadu Kalohan sei partisipa sesaun audiénsia julgamentu iha Tribunál Distritál Dili (TDD) iha loron 04 fulan-janeiru 2023 iha tuku 14h30 no iha loron 21 iha Tribunál Distritál Baucau  (TDB).

“Rezultadu votasaun a-favór 32, kontra lima, abstensaun ualu (8), votu branco ida no totál deputadu prezente iha 46 ne’ebé vota iha urna, ho ida-ne’e meza deklara deputadu António da Conceição fica autorizadu atu halo depoimentu iha prosesu judisiál iha 04 janeiru 2023,”  Prezidente Parlamentu Nasionál, Aniceto Longuinhos Guterres Lopes, fó sai iha sala plenária PN.

Nia esplika, deputadu Kalohan bele partisipa direta julgamentu ne’ebé sei mai no bele mós liu hosi resposta eskrita.

Tuir komisaun A trata asuntu Justisa no Konstituisionál pronúnsia prezente paresér kona-ba pedidu autorizasaun PN ba Deputadu Kalohan presta deklarasaun hanesan testamuña tuir konstituisionál no legál.

Konstituisaun iha artigu 94 (Imunidade), iha alínea 1 hateten Deputadu sira la hatán ba lia sivíl, lia kriminál eh lia dixiplinár tan sira-nia votu no sira-nia hanoin bainhira hala’o daudaun kna’ar.

Iha alienea 2 hateten imunidade parlamentár nian bele hasai tiha tuir buat ne’ebé hakerek iha Parlamentu Nasionál nia rejimentu.

Prezidente komisaun A, Joaquim dos Santos, hateten tuir paresér ne’ebé iha deputadu Kalohan sai testamuña parese kazu partisipasaun ekonómia no negósiu ligadu  bainhira uluk sai hanesan ministru.

Notísia Relevante:PN hasai ona imunidade ba Deputadu António da Conceição

Jornalista : Nelson de Sousa

Editór       : Cancio Ximenes

Publisidade

Leave a Reply

Latest Post

error: Content is protected !!