Populasaun Laclo agradese ba PR Horta distribui nesesidade bázika
DILI, 19 dezembru 2022 (TATOLI)—Populasaun sira hosi suku Uma Naruk, Laku Mesak no Laikore, postu administrativu Laclo, munisípiu Manatutu hato’o agradesimentu ba Prezidente Repúblika (PR), José Ramos Horta, ne’ebé distribui nesesidade bázika hanesan, foos, mina, supermie ba povu ne’ebé moris vulneravél liu.
Apoia ne’e distribui direta hosi asesór lojístika no patrimóniu Prezidénsia Repúblika, Joel Cristovão, ba populasaun sira kompostu aldeia Fahilakor ema na’in-71, suku Uma Naruk, aldeia Labubu na’in-93, suku Laku Mesak no suku Laikore na’in-31.
Populasaun hosi suku Laku Mesak, Maria Batu-Leci, hato’o agradesimentu ba apoia aihan hirak ne’e bele ajuda sira-nia nesidade uma laran.
“Ami agradese tebes ba apoiu aihan ne’e labele haree ba ninia kuantidade uitoan ka barak, agradese liu ita-nia prezidente bele fó apoiu hirak ne’e to’o duni mai ami,” Nia hato’o liu hosi komunikadu imprensa ne’ebé Ajénsia TATOLI asesu hosi mídia Palásiu Prezidensiál, segunda ne’e.
Xefe Aldeia Raihatu, José da Silva, apresia tebes ho apoia PR Horta ne’ebé halo distribuisaun aihan ba povu tomak inklu sira-nia aldeia bele konsumu hodi simu selebrasaun festa santu natál no tinan foun 2023.
“Apoiu ne’e lori mai ami fahe duni ba populasaun sira-ne’ebé ami identifika katak, sira mak merese atu simu tanba haree ba kondisaun moris susar tebes. Tanba ne’e agradese ba PR Ramos-Horta nia laran di’ak lori apoia ne’e too kedas área remota,” nia agradese.
Populasaun sira iha área ne’eba maiória moris ho vida agrikultura halo to’os hanesan kuda batar, forerai, aifarina no aihan sira seluk tan, tanba maiória povu hela iha foho leten.
Asesór Lojístika no Patrimóniu Prezidénsia Repúblika, Joel Cristovão, hateten apoia ne’e Xefe Estadu haruka distribui prioridade ba povu ne’ebé hela iha área remota no la asesu ba eletrisidade, bee moos no estrada.
“Apoia ne’e fó hosi ita nia prezidente hodi ajuda ama no apa no alin sira bele konsumu durante loron boot nata,l” nia hateten.
Nia hatutan, apoiu ne’e ekipa hala’o distribuisaun mós ba Aileu, Ermera, Maliana-Bobonaro no família sira-ne’ebé ho kondisaun defisíensia.
Mota sobu ai-riin eletrisidade monu, povu moris iha nakukun
Iha parte seluk, xefe suku Laku Mesak, Filomeno Rotrigues Pereira Carçeres, preokupa impaktu hosi inundasaun iha loron 4 abríl 2021 to’o agora afeita ba riin eletrisidade sira hosi área Malorok-suku Laku Mesak, aldeia Nakaleu to’o suku Hohorai moris iha kondisaun nakukun nia laran.
Problema hirak ne’e aprezenta ona ba autoridade munisípiu Manatuto hodi levanta to’o Governu sentrál maibé to’o agora seidauk foti desizaun haruka ekipa tékniku no Ministériu Obras Públika (MOP) liu hosi Institutu Jestaun Ekipamentu (IGE) atu bele koloka ekipamentu pezadu ba hadia hikas kondisaun dalan no ponte hirak ne’ebé kotu.
“Mota sobu to’o agora rin eletrisidade nia lubuk ida monu no rai halai halo riin eletrisidade monu no fiu kotu ahi la lakon too agora,” nia preokupa.
Preokupasaun hanesan hato’o mós hosi populasaun suku Laku Mesak, Maria Batu-Leci, triste sira nia aldeia to’o agora eletrisidade rin harii ona, maibé intalasaun fiu eletrisidade seidauk to’o sira-nia fatin.
“Ida-ne’ebé halo ha’u triste liu mak to’o agora eletrisidade seidauk lakan, udan tinan kotuk halo rin eletrisidade monu hotu ahi la lakon too agora. Ami sei terus mós ba bee-moos araska tebes ba ami,” nia dehan.
Xefe Aildeia Raihatu, José da Silva, husu ba Governu tau konsiderasaun ba problema ne’ebé povu enfrenta bele solusiona hodi povu bele moris ho kontente no goza liberdade independénsia ne’e.
Nia dehan, povu Laclo no aldeia lubun ida durante tempu rezisténsia subar mós lider rezidénsia sira hanesan atuál Primeiru Ministru, Taur Matan Ruak no veteranu lubun ba hela iha ne’eba povu maka salva no tau matan.
Jornalista : Nelson de Sousa
Editór : Cancio Ximenes
