DILI, 19 dezembru 2022 (TATOLI)–Reitór Institutu Ensinu Superiór Privadu, Institute of Bussiness (IOB), Pedro Miguel Barreto Ximenes, husu ba graduadu ne’ebé simu ona graduasaun, segunda ne’e, bainhira hetan ona servisu tenke hatudu nafatin responsabilidade hodi kuidadu naran di’ak IOB.
“Ha’u-nia lia menon ba graduadu na’in-253 ne’ebé simu ona graduasaun, depois akaba ona hosi fatin ida-ne’e, kuandu hetan ona servisu ruma, kualker servisu saida de’it no kualker pozisaun saida de’it maka tenke halo no asume, maski simplis ba mós tenke halo ho didi’ak ho fuan no domin tomak, ho nune’e maka rezultadu sei sai di’ak liután,” Reitór hateten iha serimónia graduasaun ne’ebé hala’o iha kampus IOB, Manleuana, segunda.
Reitór ne’e hakarak konvense estudante sira liuhosi mensajen Santa Teresa Calkuta nian, katak la’ós ema hotu bele halo buat ne’ebé boot, maibé ema hotu bele halo buat ne’ebé mak kiik maibé tenke halo ho domin boot.
“Liafuan ida-ne’e motiva tebes ema hotu, liu-liu ba estudante sira atu servisu iha ne’ebé de’it tenke hanoin mensajen ida-ne’e,” nia akresenta.
Notísia relevante: MESSK publika ona Lista estudante IOB ne’ebé atu simu graduasaun
Nia dehan, graduadu ne’ebé simu ona gradusaun tanba akaba ona estudu durante tinan-lima iha IOB ho grau akadémiku baxarelatu, lisensiatura inklui mestradu.
“Ohin ita halo ona graduasaun ba estudante finalista hamutuk 253 hosi fakuldade ekonomia negósiu no fakuldade ospitalidade turizmu. Aban ita sei gradua tan estudante hamutuk 250 ho grau akadémiku mestradu hosi fakuldade ICT, ho nune’e totál graduadu ba tinan 2022 ne’e hamutuk 503,” nia tenik.
Estudante graduadu ne’ebé finaliza ona estudu maioria liu ona prosesu hotu no sira hosi diploma II no III kuaze liu ona estudu durante tinan-rua, ho balun liuhosi estájiu fulan-tolu nia laran.
Enkuantu sira ne’ebé lisensiatura kumpre ona prosesu tinan-haat to’o tinan-lima, hafoin kompila ho rezultadu monografia ne’e maka simu ona direitu nu’udar estudante finalista iha grau akadémiku ida-idak nian.
Ho nune’e, ba sira ne’ebé hetan valór di’ak hosi IOB ninia, estandarizasaun tenki boot liu 3,6 ba leten.
Estudante 253 ne’ebé simu ona gradusaun iha loron 19 dezembru 2022 ne’e kompostu hosi estudante grau akadémiku baxarelatu diploma II no diploma III na’in-51 no hosi grau akadémiku lisensiatura hamutuk estudante 202.
Jornalista : Tomé Amado
Editora : Julia Chatarina
