DILI,19 dezembru 2022(TATOLI)—Fundu Nasaun Unida ba labarik (UNICEF,sigla Portugés), segunda ne’e, entrega reajente teste kualidade bee no ekipamentu eletróniku ba Ministériu Saúde.
Reajente ne’ebé entrega mak test kit bee hamutuk ualu,ekipamentu eletróniku kuantidade ualu hodi distribui ba munisípiu ualu hanesan Aileu, Ainaro, Atauro, Ermera,Manatuto Lautem, Liquiça no Viqueque.
Alende UNICEF entrega mós reajente test kit bee hamutuk box 101 hodi distribui ba munisípiu 14 iha Timor laran tomak.
“Sasan sira ne’e sei ajuda estabelese visilánsia kualidade bee iha munisípiu ualu inklui Atauro tanba ne’e departamentu saúde iha kada munisípiu sei simu mini laboratóriu di’ak ne’ebé bele deteta polusaun kritiku husi mikrobiolojíku kimiku no fiziku iha bee”, Representante Fundu Nasaun Unida ba Labarik (UNICEF) iha Timor Leste, Bilal Durrani, hateten bainhira entrega reajente hirak ne’e iha UN Canpaun,Caicoli.
Hodi garante dokumentasaun ne’ebé própriu ba monitorizasaun kualidade bee, mak kada munisípiu mós sei simu komputador, emprimidór no sasan sira seluk tanba identifika tendénsia sira no disemina rezultadu hodi foti dezisaun esensiál no mudansa hahalok iha komunidade sira.
“Ita orgullu tebes katak munisípiu 14, daudaun iha ona abilidade ba verifikasaun kualidade bee no monitorizasaun regular. Ida ne’e bele sai etapa primeiru ba estabelese sistema vijilánsia kualidade bee iha nasaun laran tomak”.
Iha 2019, UNICEF nota ona katak iha dezafiu maka’as sira ba fornesimentu konsumavel no reajente sira hodi kontinua halo teste liuhusi laboratóriu.
Pakote material reajente esensiál ba mini-laboratóriu ne’ebé fornese ona ba munisípiu 13 ho totál kontribusaun $100.000.
Iha biban hanesan, Ministra Saúde, Odete Maria Freitas Belo, dehan apoiu ne’e atu asegura kualidade bee mak hanesan reajente ba ekipamentu teste kualidade bee nian nomós ekipamentu eletróniku sira.
“Teste kualidade bee hemu durante ne’e ita halo hela iha laboratóriu nasionál saúde, maibé reajente ne’e bele teste kualidade bee ne’ebé posu hodi hatene bee nia fonte”, nia afirma.
Nune’e, Ministru Obra Publika, Abel Pires dehan kada tinan MOP tau orsamentu liuliu fundu ba iha Bee Timor-Leste, Empreza Públiku (BTL, E.P) ho esforsu atu kontinua hadi’a kualidade fornesementu bee ba komunidade sira.
Jornalista : Felicidade Ximenes
Editór : Florencio Miranda Ximenes
