DILI, 20 dezembru 2022 (TATOLI) – Governu liuhosi Ministériu Eduakasaun, Juventude no Desportu (MEJD), Ministériu Saúde hamutuk ho parseiru dezenvolvimentu UNICEF, tersa ne’e, lansa fatin asesibilidade ba ema ho defisiénsia no matadalan operasionál ba direitu hanesan no oportunidade hanesan atu kontribui ba prosesu dezenvolimentu nasionál.
Ba fatin refere konstrui iha edífisiu SEJD ho objetivu atu garante direitu ema ho defisiénsia bá asesu fasilidade ka edífisiu públiku-sira liuliu trata ema hotu hanesan no iha direitu iha nasaun ne’e.

Biban ne’e, Ministru Edukasaun, Juventude no Desportu (MEJD), Armindo Maia, fó agradesimentu ba SEJD ho nia parseiru dezenvolvimentu hanesan UNICEF ne’ebé apoiu hodi konstrui fatin ba asesibilidade ho nia-fasilidade ba joven adolxente sira ne’ebé moris ho defisiénsia.
“Ita nia infrastrutura ne’e ba joven no adolesente sira ho defisiénsia atu mai partisipa iha kualkér atividade ruma iha resintu SEJD, sei iha asesu ba fatin sira ne’ebé mak durante ne’e sira iha difikuldade atu asesu, sala enkontru, fasilidade desportu sira hanesan kampu basketból ho volleyból, toilet no mós bele tama mai resintu SEJD nian husi estrada boot,” Ministru Armindo hateten hafoin lansa fatin refere iha Lecidere.
Tinan oin, Governu sei servisu hamutuk nafatin ho parseria internasionál sira liuliu hanesan UNICEF atu bele kria fatin hanesan ne’e iha Ministériu hotu ka fatin públiku seluk, nune’e bele fasilita ema ho difisiente sira bele utiliza.
Iha biban hanesan, Reprezentante UNICEF iha Timor-Leste, Bilal Durran, sente kontente tebes hamutuk ho Governu no ema ho difisiénsia hotu lansa projetu ne’e.
Tanba, nia dehan sai fatin aktivizmu foinsa’e asesivél liu no matadalan prátika ida atu ajuda Governu no parseiru dezenvolvimentu sira hodi asegura katak adolexente no foin-sa’e ho defisiénsia sira bele ezerse sira-nia direitu ba partisipasaun, no mós ajuda forma desizaun sira ne’ebé foti kona-ba asuntu sira ne’ebé afeta ba sira-nia moris.
UNICEF sente orgullu tebes tanba suporta ona harii rampa, halo instalasaun ba bloku orientadór (guidingblock), ne’ebé foin dahuluk iha Timor-Leste no hadi’a sentina, atubele sai asesivél ba ema ho difisiente sira.
“Ami hotu haree ona, iha tinan 2021, oinsá foin-sa’e sira mobiliza hodi ajuda hamoos Dili no apoia família vulneravel sira hodi hamoos sira-nia uma, eskritoriu SEJD mak sai sede ba esforsu sira ne’ebé lidera husi juventude sira. Tanba ne’e importante tebes katak eskritóriu ne’e inkluzivu”, nia afirma.
Jornalista: Hortencio Sanchez
Editór : Florencio Miranda Ximenes