DILI, 20 dezembro 2022 (TATOLI)—Governu liuhosi Ministériu Asuntu Parlamentár no Komunikasaun Sosiál (MAPKOMS), tersa ne’e, hala’o enkontru ho mídia-na’in sira atu hametin kooperasaun servisu iha ámbitu publikasaun informasaun.
“Mídia privadu sira ne’e tuir loloos sira tenke eziste no sira iha kooperasaun ho Governu, maibé Governu labele diretamente apoia sira ho orsamentu. Maibé lei mós fó dalan ba ami atu haree posibilidade seluk ne’ebé bele halo atu fó apoiu ba ita-nia media sira liuhosi dalan ne’ebé legál. Dalan legál ne’e iha, entaun komunikasaun ho mídia privadu sira hanesan pasu ida importante Governu halo kooperasaun serbisu atu hametin publikasaun informasaun,” Ministru Asuntu Parlamentár no Komunikasaun Sosiál (MAPKOMS), Francisco da Costa Jerónimo, hateten ba jornalista sira iha Salaun City8 Manleu-ana, Díli tersa ne’e.
Ba future, Governu nafatin iha kompromisiu atu apoiu mídia nasionál sira, nune’e bele divulga informasaun ba públiku.
“Kompromisiu ne’ebé Governu hateten mak nafatin esperiénsia ami-nian la’o ona tinan ida resin mai oin, ida-ne’e sei la’o ba oin nafatin,” nia dehan.
Aliende ne’e, iha futuru karik Governu foun mai kontinua halo kooperasaun servisu ho mídia nasionál sira, nune’e bele partilla servisu Governu liuhosi publikasaun informasaun.
“Governu sé de’it mak mai laiha problema, maibé ha’u hanesan Ministru antes termina mandatu ha’u sei entrega hanesan memória institusionál ida ba Governu ka Ministru ne’ebé mai, atu hateten ba nia saida mak presiza halo ba future hodi hasoru malu ho mídia na’in sira, ida-ne’ebé ba mídia sira no ida-ne’ebé ba entidade sira. Ida-ne’e kompromisiu ha’u-nian sei entrega ho di’ak atu nune’e bele halo relatóriu fó ba nia atu kontinua hala’o nia kna’ar,” nia hateten.
Diretóra Rádiu Rakambian, Cristiana Ximenes Belo, hateten sorumutu ne’ebé mídia na’in sira halo ho MAPKOMS espera iha erra globalizasaun ne’e tenke esforsu an, nune’e bele aproveita kanal dijitalizasaun balun.
“Esperansa ba mídia importante mak ita agora globálmente adapta ba erra dijitalizasaun, entaun ita mídia tradisionál sira hakarak ka lakohi tenke esforsu ona atu nune’e bele aproveita kanál balun dijitalizasaun nian. Maibé, obstakulu mídia sira hasoru mak ita laiha ekipamentu ne’ebé adekuadu atu halo dijitalizasaun. Tanba ne’e, dala barak ita-nia jornalista atu foti fonte informasaun balun ita kestiona katak, iha tendénsia ne’ebé mosu mak miss informasaun mosu iha ne’ebá,” nia dehan.
Aleinde ne’e, dala barak mídia sira liu-liu instituisaun Rakambia labele foti informasaun balansu ka fonte ne’ebé tenke mai ho kualidade, tanba obstakulu mak transportasaun atu haruka jornalista ba konfirma ho fonte.
Ida seluk mak fontes balun lakohi oferese nia an atu ita entrevista, entaun ida-ne’e mós impaktu ba kualidade jornalizmu nian, tanba tempu agora mós globálmente ema luta ba dis informasaun no mis informasaun tanba ita-nia produtu jornalizmu la bazea ba estadarizasaun ne’ebé iha,.
Maibé obstakulu ne’ebé mai mós hosi rekursu internál rasik ho ekipamentu, nune’e nia sujere ba MAPKOMS bele fó apoiu ba mídia nasionál sira, atu nune’e jornalista no mídia sira bele halo kolaborasaun di’ak ho entidade Governu sira.
Jornalista : Nelia Fernandes
Editór : Cancio Ximenes
